अपि पावरले १०.५० प्रतिशत बोनस सेयर दिने, अर्को वर्ष दोहोरो अंकको लाभांश

काठमाडाैं । अपि पावर कम्पनी लिमिटेडले आफ्ना सेयरधनीहरूलाई १०.५० प्रतिशत बोनस सेयर दिने निर्णय गरेको छ । कम्पनीको भदौ २५ गते सम्पन्न १८औं वार्षिक साधारणसभाले आर्थिक वर्ष २०७७÷७८ को मुनाफाबाट उक्त परिमाणको बोनस सेयर र ०.३९३६ प्रतिशत हकप्रद सेयर जारी गर्ने निर्णय गरेको छ ।

कम्पनीले चालू आर्थिक वर्षबाट दार्चुलामा ४० मेगावाटको माथिल्लो चमेलिया जलविद्युत आयोजना निर्माण गरिरहेको छ । यस आयोजनाको निर्माण करिब ३५ प्रतिशत सम्पन्न भई सकेको कम्पनीले जानकारी दिएको छ । आयोजनाबाट आगामी वर्ष विद्युत उत्पादन गर्ने लक्ष्य राखिएको छ ।

हकप्रद सेयर जारी गरी संकलित पुँजी यसै आयोजनाको निर्माणमा लगानी गर्ने कम्पनीको योजना छ । कम्पनीले यसै आवमा चन्द्रनिगाहपूरमा ४ मेगावाटको सौर्य विद्युत आयोजना निर्माण गरी सञ्चालनमा ल्याएको छ ।

यसैगरी, चालू वर्षको मंसिरसम्म धनुषाको ढल्केबरमा १ मेगावाट र सिमरामा १ मेगावाटका सौर्य आयोजना सञ्चालनमा ल्याउने कम्पनीले जनाएको छ । यी सबै आयोजनाको निर्माणपछि अपि पावर ६२.५० मेगावाटका विद्युत आयोजना सञ्चालन गर्ने कम्पनी हुनेछ ।

आगामी वर्षदेखि कम्पनीको मुनाफामा उल्लेख्या वृद्धि हुने र दोहोरो अंकको लाभांश उपलब्ध गराउने दाबी गरिएको छ ।