एशियन हाइड्रोको ७ लाख कित्ता सेयर आवेदन खुल्ला

काठमाडौं । एशियन हाइड्रो पावर लिमिटेडले करिब ७ लाख कित्ता सेयर निष्कासन गरेको छ । कम्पनीले सर्वसाधारणका लागि छुट्याएको ६ लाख ९७ हजार २ सय कित्ता सेयर निष्कासन गरेको हो ।

कम्पनीका अनुसार जारी पुँजी ३४ करोड रुपैयाँको २४.७१ प्रतिशत हुन आउने अर्थात ८ लाख ४० हजार कित्ता साधारण सेयरमध्येको १० प्रतिशत हुन आउने अर्थात ८४ हजार कित्ता सेयर श्रम स्वीकृति प्राप्त गरी विदेशमा बसिरहेका नेपाली नागरिकका लागि बाँडफाँड गरिएको र २ प्रतिशत हुन आउने अर्थात १६ हजार ८ सय कित्ता सेयर कम्पनीका कर्मचारीका लागि सुरक्षित गरिएको छ ।

बाँकी ६ लाख ९७ हजार २ सय कित्ता सर्वसाधारणका लागि निष्कासन गरिएको कम्पनीले जनाएको छ । सर्वसाधारणले न्यूनत्तम १० कित्तादेखि अधिकत्तम २० हजार कित्ता सम्म आवेदन दिन पाउनेछन् ।

सर्वसाधारणले छिटोमा फागुन २ गतेसम्म र ढिलोमा फागुन १२ गते सम्म आवेदन दिन पाउनेछन् । कम्पनीको सेयर निष्कासन गरी बाँडफाँड गर्न एनएमबी क्यापिटल लिमिटेडलाई बिक्री प्रबन्धक तोकिएको छ ।

कम्पनीको इलाममा ६.२ मेगावाटको तल्लो जोगमाई जलविद्युत आयोजना सञ्चालनमा छ । उक्त आयोजनाले २०७८ कातिक १५ गतेदेखि व्यापारिक उत्पादन सुरु गरेको हो । आयोजनाको कुल लागत १ अर्ब ३१ करोड १५ लाख ३० हजार रहेको छ ।