पाँचथर पावर कम्पनीले ३ महिनामा १० करोड ३१ लाख खुद नाफा कमायो

काठमाडौं । पाँचथर पावर कम्पनीले करिब १० करोड ३१ लाख रुपैयाँ खुद नाफा कमाएको छ । कम्पनीले चालु आर्थिक वर्ष २०७८/७९ को पहिलो त्रैमाससम्मको अवधिमा सो मुनाफा कमाएको हो ।

साउनदेखि असोजसम्मको अवधिमा १० करोड ३१ लाख ३९ हजार रुपैयाँ खुद नाफा कमाएको कम्पनीले जनाएको छ । कम्पनीका अनुसार यो नाफा अघिल्लो वर्षको यही समयअवधिको तुलनामा ३ करोड १८ लाख ४० हजार रुपैयाँ बढी हो । अघिल्लो वर्ष ७ करोड १२ लाख ९९ हजार खुद नाफा कमाएको थियो ।

यो अवधिमा विद्युत बिक्रीबाट हुने आम्दानी पनि बढेको छ । कम्पनीले यो अवधिमा १४.९ मेगावाटको हेवा खोला ‘ए’ जलविद्युत गृहको विद्युत बिक्री गरी १६ करोड २७ लाख ५० हजार रुपैयाँ आम्दानी गरेको छ । गतवर्ष १४ करोड ६१ लाख ९ हजार रुपैयाँ आम्दानी गरेको थियो ।

यो अवधिमा अन्य स्रोतबाट १२ लाख ६ हजार रुपैयाँ आम्दानी भएको पनि कम्पनीले जनाएको छ । कम्पनीको हेवा खोला ‘ए’ ले २०७३ माघ २२ गतेदेखि नियमीत विद्युत उत्पादन गरीरहेको छ ।