ऊर्जा खबर
काठमाडौं । सुन्दर यातायात टेडर्सले डेढ महिनाभित्र २० वटा विद्युतीय बस ल्याउने भएको छ । कम्पनीले देशको विद्युत खपत बढाई बढ्दो वातावरण प्रदुषण नियन्त्रणमा सहयोग पुर्याउने उद्देश्य राखी यसो गर्न लागेको हो ।
बिहीबार सम्पन्न तेस्रो वार्षिक उत्सवका अवसरमा आयोजित कार्यक्रममार्फत डेढ महिना भित्रमा सबै बस ल्याइसक्ने टेडर्सका अध्यक्ष भेषबहादुर थापाले बताए । उनका अनुसार २० बसमध्ये १४ वटा काठमाडौं उपत्यकामा सञ्चालन गरिनेछ । बाँकी ६ वटा रुपन्देही जिल्लामा सञ्चालन गरिनेछ ।
नयाँ सवारीहरु ४० र ३६ सिट क्षमताका हुनेछन् । साथै, आगामी ६ महिनाभित्र एक सय वटा विद्युतीय बस देशभर सञ्चालन गरिने पनि थापाले बताए ।
हाल चक्रपथमा मात्र चलिरहेको बस अब भने उपत्यका भर फैलाइने उनको भनाई छ । ‘हामी नाफामा भने जान सकेका छैनौ, तर अब अवस्था सामान्य हुने अपेक्षासहित नयाँ बस थप्ने तयारी गरेका हौं,’ उनले भने ।
कोभिड महामारीका कारण लामो समय गरिएको निषेधाज्ञाले कम्पनील निकै ठूलो चुनौती सामना गर्नु परेको थापाले बताए । त्यस्तै, सुन्दर यातायातले रुपन्देही जिल्लाको सैनामैना नगरपालिकामा विद्युतीय बस उत्पादन गर्न एसेम्बल प्लान्ट निमार्ण थालेको छ ।
कम्पनीले यसअघि ७ वटा विद्युतीय बस र ४ वटा हाइस ल्याएर सञ्चालन गरिरहेको छ । ४ वटा बस चक्रपथ र एउटा सूर्यविनायक–रत्नपार्क रुटमा सञ्चालन गरिरहेको छ । हाइस २ वटा बौद्धदेखि रत्नपार्क रुटमा र २ वटा चक्रपथमा सञ्चालन गर्न परीक्षण भइरहेको छ ।
सुन्दर यातायातले विद्युतीय सवारी चार्ज गर्न विभिन्न स्थानमा आफै चार्जिङ स्टेसन राखेको छ । सरकारले आगामी आर्थिक वर्षको बजेट तथा कार्यक्रममा विद्युतीय सवारीमा अन्तःशुल्क खारेज र कर छुट गरेपछि यातायात व्यवसायी आकर्षित देखिएका छन् ।
.jpg)
