ऊर्जा खबर
काठमाडाैँ । नेपाल विद्युत् प्राधिकरण ढल्केबर महाशाखा अन्तर्गतका सबस्टेसनहरूमा पावर ट्रान्सफार्मरको स्तरोन्नति तथा नयाँ ट्रान्सफार्मर जडान गरी विद्युत् आपूर्ति प्रणालीलाई थप सुदृढ बनाइएको छ । लहान सबस्टेसनमा रहेको ३० एमभीए, १३२/३३ केभी ट्रान्सफार्मरलाई गत असार ९ गते स्तरोन्नति गरी ६३ एमभिएमा स्तरोन्नति गरिएको छ ।
महाशाखाका अनुसार सोही सबस्टेसनका दुई थान १६.६ एमभिए, ३३/११ केभी ट्रान्सफार्मरहरूलाई स्तरोन्नति गरी २४/२४ एमभीएको बनाइएको छ । यी दुईमध्ये पहिलो ट्रान्सफार्मर जेठ ६ गते र दोस्रो साउन २० गते सफलतापूर्वक स्तरोन्नति गरिएको हो ।
यसैगरी, चन्द्रनिगाहपुर सबस्टेसनमा पनि विद्युत् सेवा विस्तार एवं सुदृढीकरणका लागि साउन २२ गते १६.६ एमभिए, ३३/११ केभीको एक थान नयाँ ट्रान्सफार्मर थप जडान गरिएको छ ।
सबस्टेसनहरूमा गरिएका यी महत्त्वपूर्ण स्तरोन्नति र क्षमता अभिवृद्धिका कार्यहरूबाट लहान र चन्द्रनिगाहपुर क्षेत्रको विद्युत् वितरण प्रणाली अझ बढी गुणस्तरीय, पर्याप्त र भरपर्दो हुने अपेक्षा गरिएको महाशाखाले जनाएको छ ।
