ऊर्जा खबर
काठमाडौं । प्रदेश नम्बर १ का विभिन्न जिल्लामा ५ हजार मेगावाट बढी क्षमताका जलविद्युत आयोजनाहरूको अध्ययन भइरहेको छ । प्रदेशको १४ वटा जिल्लामा पहिचान भएका आयोजनाको निर्माण प्रक्रिया अघि बढाउन अध्ययन भइरहेको हो ।
विद्युत विकास विभागका अनुसार विभिन्न जिल्लामा पहिचान भएका ५०७० मेगावाटका आयोजनाको अध्ययन भइरहेको छ । २०७९ असार १५ गतेसम्मको विवरण अनुसार विभिन्न क्षमताका आयोजनाले अनुमति लिई अध्ययन अघि बढाएका छन् ।
प्रदेशको इलाम, झापा, पाँचथर, ताप्लेजुङ, तेह्रथुम, संखुवासभा, सोलुखुम्बु, भोजपुर, धनकुटा, खोटाङ, मोरङ, ओखलढुङ्गा, सुनसरी र उदयपुर जिल्लामा पहिचान भएका आयोजनाले अध्ययन अनुमति लिएको विभागले जनाएको छ ।
अध्ययन भइरहेका आयोजनामध्ये ५ मेगावाट बढी क्षमताका २३४० मेगावाटका आयोजनाले अध्ययन अनुमति लिएको विभागले जनाएको छ । यस्तै, १०० मेगावाटदेखि ५ सय मेगावाट क्षमतासम्मका १६७० मेगावाट क्षमतासम्मका आयोजनाले, २५ देखि १०० मेगावाट क्षमतासम्मका ६८४ मेगावाटका आयोजनाले, ५ देखि २५ मेगावाट क्षमतासम्मका ३६६ मेगावाटका आयोजनाले र ५ मेगावाटभन्दा कम क्षमताका १० मेगावाटका आयोजनाले अध्ययन अनुमति पाएको तथ्याङकमा उल्लेख छ ।
यही प्रदेशमा असार १५ गतेसम्ममा ९४१ मेगावाटका आयोजनाले अध्ययन पूरा गरी उत्पादन अनुमतिका लागिका आवेदन दिएको विभागले जनाएको छ । अध्ययन पूरा भएका आयोजनामध्ये १०० मेगावाटदेखि ५०० मेगावाट क्षमतासम्मका ६३५ मेगावाटका जलविद्युत आयोजना रहेको विभागको तथ्याङ्कमा उल्लेख छ । यस्तै, २५ मेगावाटदेखि १०० मेगावाटसम्मका २२० मेगावाटका आयोजना, ५ देखि २५ मेगावाटका ८३ मेगावाटका आयोजना र ५ मेगावाटभन्दा कम क्षमताका ३ मेगावाटका आयोजनाको अध्ययन सकिएको छ । यी आयोजनाले उत्पादन अनुमतिका लागि विभागमा आवेदन दिएका छन् ।
यो प्रदेशमा हालसम्मा २४८२ मेगावाटका आयोजनाले उत्पादन अनुमति लिई निर्माण प्रक्रिया अगाडी बढाएका छन् । १०० मेगावाटदेखि ५०० मेगावाट क्षमता सम्मका ४१३ मेगावाटका आयोजनाले उत्पादन अनुमति पाएको विभागको तथ्याङ्कमा उल्लेख छ । २५ मेगावाटदेखि १०० मेगावाट सम्मका ७८७ मेगावाटका आयोजना, ५ मेगावाटदेखि २५ मेगावाट सम्मका ३७० मेगावाटका आयोजना र ५ मेगावाट भन्दा कम क्षमताका १२ मेगावाटका आयोजनाले उत्पादन अनुमति पाएको विभागले जानकारी दिएको छ ।
हालसम्मका यी प्रदेशका विभिन्न जिल्लाबाट करिब ३७० मेगावाट विद्युत राष्ट्रिय प्रसारण प्रणालीमा जोडिएको छ ।
