ऊर्जा खबर
काठमाडौँ । कास्कीको माछापुच्छ्रे गाउँपालिका–२ मा प्रस्तावित २.९ मेगावाटको माथिल्लो सार्दी खोला जलविद्युत् आयोजनाको बिजुली प्रवाह गर्न प्रसारण लाइन निर्माण गरिने भएको छ । आयोजना प्रवर्द्धक मन्दाकिनी हाइड्रोपावर लिमिटेडले ३३ केभीको ३.६८ किलोमिटर लामो सिङ्गल सर्किट प्रसारण लाइन निर्माण गर्न अनुमति माग्दै विद्युत् विकास विभागमा आवेदन दिएको हो ।
विभागका अनुसार माथिल्लो सार्दी खोला जलविद्युत् आयोजनाको स्विचयार्डदेखि सोही गाउँपालिकामा रहेको ४ मेगावाटको सार्दी खोला जलविद्युत् आयोजनाको स्वीयार्डसम्म उक्त लाइन निर्माण गर्ने प्रस्ताव गरिएको छ ।
लाइनअन्तर्गत २२ देखि ९४ मिटरको दूरीमा ११ मिटर अग्ला ७८ वटा टुबुलर पोलहरू रहने छन् । प्रसारण लाइन निर्माणको काम ६ महिनाभित्र पूरा गर्ने प्रस्ताव गरिएको छ ।
उक्त प्रसारण लाइन निर्माण तथा सञ्चालन गर्दा कुनै उल्लेखनीय प्रतिकूल वातावरणीय प्रभाव पर्ने देखिए ३५ दिनभित्र लिखित राय सूझाव उपलब्ध गराउन आग्रह गर्दै विभागले सोमबार सूचना जारी गरेको छ ।
.jpg){kind=spacer}
