ऊर्जा खबर
काठमाडौं । २५ मेगावाटको माथिल्लो दोर्दी ‘ए’ जलविद्युत आयोजनाको विद्युत आगामी असार पहिलो सातादेखि राष्ट्रिय प्रसारण प्रणालीमा जोडिने भएको छ । लमजुङमा लिवर्टी इनर्जीले निर्माण गरेको आयोजनाको विद्युत प्रणालीमा थपिन लागेको हो ।
आयोजनाको पूननिर्माणको काम अन्तिम चरणमा पुगेकोले असार पहिलो सातादेखि उत्पादन सुरु गर्ने तयारी भइरहेको कम्पनीले सार्वजनिक गरेको आर्थिक वर्ष २०७८/७९ को वित्तिय विवरणमा उल्लेख छ । विवरणका अनुसार विद्युत जोडिने प्रसारण लाइनको काम पनि अन्तिम चरणमा पुगेको छ ।
निर्माण सम्पन्न आयोजनामा गत २०७८ असारमा आएको बाढीले ठुलो क्षति पुर्याएको थियो । बाढीले पुर्याएको क्षतिको पुन निर्माणको काम सकिन लागेको कम्पनीले जनाएको छ ।
आयोजनाबाट २०७६ चैतदेखि विद्युत उत्पादन सुरु गर्ने तालिका थियो । तर, प्रसारण लाइनको समस्या, विश्वव्यापी रुपमा फैलिएको कोरोना महामारी र बाढी पहिरोको कारण उत्पादन तालिका धकेलिदै आएको छ ।
यस अघि आयोजना सम्पन्न गर्न ४ अर्ब ६४ करोड ६१ लाख रुपैयाँ लागतमा सम्पन्न भएकाे थियाे । बाढीले पुर्याएकाे क्षतिकाे पुन निर्माण गर्दा लागत बढेकाे छ । आयोजना सञ्चालनमा आएपछि वार्षिक १३ करोड ६७ लाख ८४ हजार ८ सय ६९ युनिट विद्युत उत्पादन हुनेछ । विद्युत उत्पादन सुरु भएको पहिलो वर्षमा करिब ८० करोड रुपैयाँ आम्दानी हुने प्रक्षेपण गरिएको छ ।
दोर्दी कोरिडोरमा माथिल्लो दोर्दी ‘ए’ सँगै ५४ मेगावाटको सुपर दोर्दी ‘ख’, १२ मेगावाटको दोर्दी–१, २७ मेगावाटको दोर्दी खोला लगायत आयोजना निर्माणाधीन छन् ।
.jpg)