समयमा काम नगर्ने ७ निर्माण व्यवसायीसँग ठेक्का रद्द गर्दै विद्युत प्राधिकरण

काठमाडौं । नेपाल विद्युत प्राधिकरणले समयमा काम नगर्ने कम्पनीहरूसँग ठेक्का सम्झौता रद्द गर्ने भएको छ । ठेक्का सम्झौता गरेका निर्माणकर्ताले पटक–पटक लिखित तथा मौखिम जानकारी गराउँदा पनि निर्माण कार्य नगरेको र सन्तोषजनक कार्य नभएको भन्दै ठेक्का रद्द गर्न लागेको हो ।

सुदूरपश्चिम प्रदेशका विभिन्न स्थानमा ट्रान्सफर्मर जडान र प्रसारण लाइन विस्तार गर्ने जिम्मा पाएका ७ निर्माण कम्पनीसँगको ठेक्का खारेज गर्न लागिएको प्राधिकरणले जनाएको छ ।

नेत्र निर्माण सेवा, भगवती निर्माण सेवा, धुलिखेल एलबी र एबी जेभी, भगवती जेभी, ओम वीर भद्र निर्माण कन्स्ट्रक्सन, मनकामना निर्माण सेवा र एमएस कन्स्ट्रक्सनसँग ठेक्का सम्झौता रद्द गर्ने तयारी गरेको छ ।

प्राधिकरणले सम्झौता रद्द गर्न नपर्न कुनै मनासिव कारण भएमा सात दिनभित्र निर्माण व्यवसायी तथा आपूर्तिकर्ता स्वयम् उपस्थित भइ स्पष्टीकरण दिन आग्रह गरेको छ ।

सम्झौताबमोजिम तोकिएको काम पूरा गर्न नसकेका कम्पनीलाई कारबाही अघि बढाएको प्राधिकरणले जनाएको छ । यी कम्पनीहरूलाई आदर्श, सायल, बोगाटान, बडीकेदार, जोरयाललगायत गाउँपालिकाका धेरै स्थानमा ट्रान्सफर्मर जडान र पूर्वाधार निर्माण गर्ने ठेक्का दिइएको थियो ।