ऊर्जा खबर
वीरगञ्ज । वीरगञ्ज भन्सार कार्यालयले चालु आर्थिक वर्षको पहिलो ६ महिनामा पेट्रोलियम पदार्थको आयातबाट ३७ अर्ब ८५ करोड रुपैयाँ राजस्व सङ्कलन गरेको छ । यो अवधिमा भन्सार कार्यालयबाट कुल १ खर्ब १६ अर्ब ५८ करोड रुपैयाँ सङ्कलन भएकोमा पेट्रोलियम आयातबाट प्राप्त राजस्वको हिस्सा ठूलो देखिएको हो ।
त्यस्तै, यस नाकाबाट राजस्वको दोस्रो ठूलो हिस्सा आयात भएका यातायातका साधन र तिनको पार्टपुर्जा आयातको रहेको छ । यस्ता साधनबाट कुल १३ अर्ब ९८ करोड रुपैयाँ राजस्व सङ्कलन भएको छ । राजस्व सङ्कलनमा फलाम, कपडा, इलेक्ट्रिक सामग्री र मदिराजन्य वस्तुको आयातको योगदान रहेको छ ।
कार्यालयका सूचना अधिकारी उदयसिंह विष्टले वीरगञ्ज भन्सारको राजस्व पेट्रोलियम पदार्थको आयात र यातायातका साधन र तिनका पार्टपुर्जा आयातबाट प्राप्त हुनेमा निर्भर रहेको बताए ।
चालु आवको छ महिनामा फलाम तथा फलामबाट बनेका सामानबाट ६ अर्ब ८३ करोड, कपडाबाट ५ अर्ब २६ करोड, इलेक्ट्रिक मेसिनरी, उपकरण र तिनका पार्टपुर्जाबाट ४ अर्ब ९१ करोड रुपैयाँ राजस्व सङ्कलन भएको छ ।
त्यस्तै, मदिराजन्य पेयपदार्थको आयातबाट भने १ अर्ब ८३ करोड र शृङ्गारको सामानबाट एक अर्ब ८१ करोड राजस्व सङ्कलन भएको छ ।
