ऊर्जा खबर
काठमाडौँ । नेपाल आयल निगमको कार्यकारी निर्देशकमा डा. चण्डिकाप्रसाद भट्ट नियुक्त भएका छन् । आइतबार बसेको मन्त्रिपरिषद् बैठकले उनलाई निगमको कार्यकारी निर्देशकमा नियुक्त गरेको हो ।
यसअघिका कार्यकारी निर्देशक उमेशप्रसाद थानीले पदावधि बाँकी छँदै पदबाट राजीनामा दिएपछि प्रतिस्पर्धाबाट कार्यकारी निर्देशक नियुक्तिका लागि दरखास्त आह्वान गरिएको थियो । १३ जनाले प्रतिस्पर्धाका लागि आवेदन दिएकोमा सबैभन्दा बढी अंक प्राप्त गरेका भट्टलाई सरकारले ३ वर्षे कार्यकालका लागि कार्यकारी निर्देशकमा नियुक्त गरेको हो ।
भट्ट यसअघि पनि २०७० जेठदेखि २०७० मंसिरसम्म निगमको कार्यकारी निर्देशक भएका थिए । त्यसताका ३६ अर्ब ऋणको भार बोकिरहेको निगमलाई २०७१ असोज १३ गते स्वचालित मूल्य प्रणालीमा लगेर भट्टले निगमलाई ऋण मुक्त बनाएका थिए ।
भारतीय आयल निगमलाई तिर्नुपर्ने बक्यौता र ऋणका कारण आयल निगमले उपभोक्ताबाट ब्याजतिर्ने पैसा समेत पेट्रोलियममार्फत उठाउने गरेको गरेको थियो । त्यस्तो अवस्थाबाट निगमलाई मुक्ति दिएका भट्ट पुनः निगमको नेतृत्वमा आएका हुन् ।
निगममा नियुक्त हुनुअघि उनी विशेष आर्थिक क्षेत्र (सेज) प्राधिकरणको कार्यकारी निर्देशकका रूपमा कार्यरत थिए ।
भट्टले यो कार्यकालमा देशमा बढेको विद्युत् ऊर्जाको आन्तरिक खपत बढाउन पेट्रोल पम्पहरूमा चार्जिङ स्टेशन स्थापना गराउनुपर्ने, खाना पकाउने एलपी ग्यासको आयात र खपत खटाउन भूमिका निर्वाह गर्नुपर्ने तथा समग्रमा पेट्रोलियम खपत कम गराउनुपर्ने चुनौतीलाई सामना गर्नुपर्ने देखिएकाे छ ।
