प्राधिकरणले भन्याेः किस्ताबन्दीमा बक्यौता तिर्नलाई ३० दिनभित्र आवेदन दिनु

काठमाडौं । नेपाल विद्युत् प्राधिकरणले ट्रंक र डेडिकेटेड लाइन प्रयोगबापतको विद्युत् महसुल बक्यौता रकम किस्ताबन्दीमा बुझाउनको लागि आवेदन दिन आग्रह गरेको छ । प्राधिकरणले सूचना जारी गर्दै आगामी ३० दिनभित्र प्राधिकरणको सम्बन्धित वितरण केन्द्रमा सम्पर्क राखी किस्ताबन्दीको सुविधाका लागि आवेदन दिन आग्रह गरेको हो ।

नेपाल विद्युत् प्राधिकरण सञ्चालक समितिको २०८०/०९/१६ को बैठकले उद्याेगीहरूसँग विगतकाे बक्यौता विद्युत् महसुल रकम असुलउपर गर्न एक पटकका लागि बढीमा ६० महिनासम्मको किस्ताबन्दीमा बुझाउन पाउने गरी निर्णय गरेको थियो । सोहि किस्ताबन्दीको सुविधाका लागि आवेदन दिन प्राधिकरणले आग्रह गरेको हो ।

केहि उद्योगले किस्ताबन्दीमा बक्यौता तिर्न सहमत भई किस्ता तिर्न थालिसकेका छन् । अधिकांश उद्योगले आफुले बिजुली उपभोग गरेको प्रमाण प्राधिकरणले देखाए मात्र बक्यौता तिर्ने बताउँदै आएका छन् । प्रमाण खोजेका उद्योगहरूले आफुले बिजुली नै नबालेको बताउदै आएका छन् ।

प्राधिकरणले बक्यौता नतिर्ने ६१ वटा उद्योगमध्ये गत पुस ६ यता २४ वटा उद्योगको लाइन काटिसकेको छ । त्यसमध्ये बक्यौताको किस्ता तिरेपछि हिमाल आइरनको भने लाइन जोडिएको छ । ६१ वटा उद्योगले प्राधिकरणलाई २२ अर्ब २४ करोड रुपैयाँ बक्यौता तिर्न बाँकी रहेकाे प्राधिकरणले बताउँदै आएकाे छ ।

प्राधिकरणकाे सूचना