ऊर्जा खबर
काठमाडौं । श्वेत गंगा हाइड्रो पावर एण्ड कन्स्ट्रक्सन लिमिटेडको सेयर बाँडफाँड भएको छ । कम्पनीले रामेछाप र सोलुखुम्बुको सिमामा निर्माणाधीन २८.१ मेगावाट तल्लो लिखु जलविद्युत आयोजना प्रभावित स्थानीयका गत जेठ २३ गतेदेखि असार ६ गतेसम्म खुल्ला गरेको सेयर बाँडफाँड गरिएको हो ।
आयोजनाको संरचना रहेको रामेछाप जिल्लाको लिखु तामाकोशी गाउँपालिकाको वडा नम्बर २, ३ र ४ तथा ओखलढुङ्गा जिल्लाको लिखु गाउँपालिका वडा नम्बर ४, ५, ६, ७, ८ र ९ का बासिन्दाका लागि जम्मा निष्कासन गरिने सेयरको ७० प्रतिशत अर्थात् ११ लाख १५ हजार १०० कित्ता सेयर बाँडफाँड गरिएको छ ।
यस्तै, आयोजनाको प्रसारण लाईन पर्ने रामेछाप जिल्लाको लिखु तामाकोशी गाउँपालिका वडा नम्बर ५, ६ र ७ र मन्थली नगरपालिकाको वडा नम्बर ११, १२ र १३ तथा रामेछाप नगरपालिकाको वडा नम्बर. १ र ३ का बासिन्दाका लागि २५ प्रतिशत अर्थात् ३ लाख ९८ हजार २५० कित्ता र रामेछाप जिल्लाको लिखु तामाकोशी गाउँपालिकाको वडा नं. १ र ओखलढुङ्गा जिल्लाको लिखु गाउँपालिकाको वडा नं. १, २ र ३ लाख ५ प्रतिशत अर्थात् ७९ हजार ६५० कित्ता गरी बाँडफाँट गरिएको छ ।
तल्लो लिखुको निर्माण अहिले ९३ प्रतिशत पूरा भइसकेको र आगामी असोजसम्म व्यावसायिकरूपमा विद्युत उत्पादन गर्ने लक्ष्य राखिएको छ । कूल ६ अर्ब ३७ करोड २० लाख रुपैयाँ लागतका आधारमा आयोजनाको प्रतिमेगावाट लागत २२ करोड ६७ लाख ६१ हजार ५०० रुपैयाँ अनुमान गरिएको छ ।
२०७२ साल चैत २८ गते कम्पनीले आयोजनाको उत्पादन अनुमतिपत्र लिएको हुँदा उसले अबको २८ वर्ष १० महिना विद्युत उत्पादन गरी सञ्चालन गर्न पाउँछ । विद्युत आयोजनाको अनुमतिपत्र वितरण सम्बन्धी निर्देशिका अनुसार उत्पादन अनुमतिपत्रको अवधि ३५ वर्ष तोकिएको हुन्छ ।
