जलस्रोत अनुसन्धान विकास केन्द्रका लेखा अधिकृत कार्कीविरुद्ध मुद्दा दायर

काठमाडौं । जलस्रोत अनुसन्धान विकास केन्द्र, पुल्चोकका लेखा अधिकृत तोरणबहादुर कार्कीले साढे ४ करोड रुपैयाँ बढी अकुत सम्पत्ति आर्जन गरेको ठहर गर्दै अख्तियार दुरुपयोग अनुसन्धान आयोगले विशेष अदालत, काठमाडौंमा मुद्दा दायर गरेको छ । आयागले ४ करोड ६७ लाख ३८ हजार ७ सय ८० रुपैयाँको खर्च तथा लगानीको वैधानिक स्रोत नखुलि अकुल सम्पत्ति आर्जन गरेको पुष्ठि भएकोले मुद्दा दायर गरेको हो ।

आयोगले कार्कीले सार्वजनिक सेवा प्रवेश गरेको २०५३ जेठ १७ गतेदेखि २०७९ मंसिर २८ गतेसम्मको समग्र आयको छानविन गर्दा १ करोड ८ लाख ४८ हजार ५ सय ९० रुपैयाँ देखिएकोमा सोही अवधिमा कार्कील ५ करोड ७५ लाख ८७ हजार ३ सय ७० रुपैयाँ खर्च गरेको पुष्टि भएको जनाएको छ ।

कार्कीको समग्र आयबाट समग्र व्यय घटाउँदा ४ करोड ६७ लाख ३८ हजार ७ सय ८० रुपैयाँको वैधानिक स्रोत नखुलेपछि रकमलाई विगो कायम गरी जरिवाना र कैद सजायको माग गर्दै अदालतमा मुद्दा दायर गरेको हो ।

सार्वजनिक पदको दुरुपयोग गरी आर्जन गरेको सम्पत्ति श्रीमती उर्मिला थापा कार्कीसमेतको नाममा जग्गा, सेयर, सवारी साधन खरिद तथा बैंक खाताहरूमा मौज्दात लगायतमा गरिएका खर्चमध्ये स्रोत नखुलेको सम्पत्ति जफतमात्र गर्नेगरी उर्मीलालाई समेत प्रतिवादि बनाई अख्तियारले मुद्दा दायर गरेको छ ।