ऊर्जा खबर
काठमाडौं । प्रदेश नम्बर १ को विभिन्न जिल्लामा पहिचान भएका ९ सय मेगावाट बढीका जलविद्युत आयोजनाको अध्ययन सकिएको छ । विद्युत विकास विभागले प्रदेश अन्तर्गतका १४ जिल्लामा पहिचान भएका आयोजनाको अध्ययन पूरा गरेको हो ।
विभागका अनुसार २०७९ असारसम्ममा ९४१ मेगावाटका आयोजनाले अध्ययन पूरा भइ उत्पादन अनुमतिका लागिका आवेदन दिएका छ । प्रदेशको इलाम, झापा, पाँचथर, ताप्लेजुङ, तेह्रथुम, संखुवासभा, सोलुखुम्बु, भोजपुर, धनकुटा, खोटाङ, मोरङ, ओखलढुङ्गा, सुनसरी र उदयपुर जिल्लामा पहिचान भएका आयोजनाको अध्ययन पूरा गरी उत्पादन अनुमतिका लागि आवेदन दिएका छन् ।
अध्ययन पूरा भएका आयोजनामध्ये १०० मेगावाटदेखि ५०० मेगावाट क्षमतासम्मका ६३५ मेगावाटका जलविद्युत आयोजना रहेको विभागको तथ्याङ्कमा उल्लेख छ । यस्तै, २५ मेगावाटदेखि १०० मेगावाटसम्मका २२० मेगावाटका आयोजना, ५ देखि २५ मेगावाटका ८३ मेगावाटका आयोजना र ५ मेगावाटभन्दा कम क्षमताका ३ मेगावाटका आयोजनाको अध्ययन सकिएको छ । यी आयोजनाले उत्पादन अनुमतिका लागि विभागमा आवेदन दिएका छन् ।
१३२ मेगावाटको तल्लो बरुण, १७१ मेगावाटको दुधकोसी–६, १६६ मेगावाटको सुपर तमोर, १६६ मेगावाटको सुपर दुधकोसी–६, ७२ मेगावाटको माथिल्लो तमोर ‘ए’ लगायतका आयोजनाको अध्ययन पूरा भएको छ ।
यो प्रदेशमा हालसम्मा २४८२ मेगावाटका आयोजनाले उत्पादन अनुमति लिई निर्माण प्रक्रिया अगाडी बढाएका छन् । १०० मेगावाटदेखि ५०० मेगावाट क्षमता सम्मका ४१३ मेगावाटका आयोजनाले उत्पादन अनुमति पाएको विभागको तथ्याङ्कमा उल्लेख छ । २५ मेगावाटदेखि १०० मेगावाट सम्मका ७८७ मेगावाटका आयोजना, ५ मेगावाटदेखि २५ मेगावाट सम्मका ३७० मेगावाटका आयोजना र ५ मेगावाट भन्दा कम क्षमताका १२ मेगावाटका आयोजनाले उत्पादन अनुमति पाएको विभागले जानकारी दिएको छ ।
