ऊर्जा खबर
काठमाडौं । ९०० मेगावाटको अरुण–३ जलविद्युत आयोजनाको विद्युत राष्ट्रिय प्रणालीमा जोडिने प्रसारण लाइन निर्माणका लागि जग्गा अधिग्रहण प्रक्रिया अघि बढाइएको छ । सतलजल जलविद्युत निगम (एसजेभिएन) अरुण तेस्रो पावर डेभलपमेन्ट कम्पनीले लाइनको जग्गा अधिग्रहणको काम अघि बढाएको हो ।
४०० केभी प्रसारण लाइन अन्तर्गतको निर्माणाधीन डिडिङ–ढल्केबर–बथनाह खण्डको जग्गा अधिग्रहणको काम सुरु गरिएको कम्पनीले जनाएको छ । कम्पनीका अनुसार धनुषाको साविक ढल्केबर २ (क), तल्ले गोदार ५(क) ७(ख) ४ (क) गाविसमा पर्ने जग्गा अधिग्रहण सूरु गर्न लागिएको छ ।
लाइनको टावरहरू निर्माणका लागि जग्गा तथा जग्गामा रहेको घर, गोठ, टहरा तथा रुख विरुवा समेत स्थायी रुपमा अधिग्रहण गर्न लागिएको हो । आगामी १५ दिनभित्र आफ्नो जग्गा प्राप्त नगर्नुपर्ने कुनै कारण भएमा त्यसको कारण खोली आयोजना मार्फत गृह मन्त्रालयमा उजुरी दिन सकिने पनि कम्पनीले जनाएको छ । अधिग्रहणका लागि जग्गाहरू रोक्का रहने हुँदा उक्त क्षेत्रमा कुनै पनि संरचना थप्ने कार्य नगर्न/नगराउनु कम्पनीले सार्वजनिक गरेकाे सुचनामा उल्लेख छ ।
