ऊर्जा खबर
काठमाडौँ । संखुवासभामा ४.१ मेगावाटको सुपर सभाखोला साना जलविद्युत् आयोजना निर्माण हुने भएको छ । सभापोखरी गाउँपालिका स्थित सभा खोलाको पानीलाई उपयोग गर्दै संखुवासभा पावर डेभलपमेन्ट प्रालिले आयोजना निर्माण गर्न लागेको हो । नदी प्रवाहमा आधारित उक्त आयोजना निर्माणका लागि कम्पनीले विद्युत् उत्पादन अनुमति पत्रको माग गर्दै विद्युत् विकास विभाग आवेदन दिएको छ ।
आयोजनाबाट वार्षिक सरदर २२.५४ गिगावाट घन्टा विद्युत् उत्पादन हुनेछ । आयोजनाबाट उत्पादन हुने बिजुलीलाई १९.५ किलोमिटर लामो ३३ केभी सिङ्गल सर्किट प्रसारण लाइनमार्फत् नेपाल विद्युत् प्राधिकरणको तुम्लिङटार सबस्टेसनमा जोडिने छ ।
प्रारम्भिक वातावरणीय प्रभाव परीक्षण (आइइई) प्रतिवेदन तयार भइसकेको छ । आयोजना निर्माण सुरु भएको २ वर्षभित्र विद्युत् उत्पादन गर्ने लक्ष्य रहेको छ ।
आयोजनाले उल्लेखनीय वातावरण प्रभाव पार्ने भए ३५ दिनभित्र लिखित राय, सुझाव तथा प्रतिक्रिया पेश गर्न आग्रह गर्दै विभागले बुधबार सूचना जारी गरेको छ ।
