ऊर्जा खबर
काठमाडौँ । झापाको बाह्रदशी गाउँपालिकामा ‘गोदक–अनारमनी १३२ केभी प्रसारण लाइन आयोजना’ अन्तर्गत नयाँ सबस्टेसन निर्माण गर्न जग्गा अधिग्रहणको कार्य अगाडि बढाइएको छ । नेपाल विद्युत् प्राधिकरणको लगानीमा निर्माण हुन लागेको सबस्टेसनका लागि उक्त गाउँपालिकाको वडा नम्बर ४ मा पर्ने २२ जना स्थानीयको स्वामित्वमा रहेको जग्गा स्थायी रूपमा अधिग्रहण गरिने भएको हो ।
यसका लागि जिल्ला प्रशासन कार्यालय झापाले मंगलबार एक सूचना प्रकाशित गरी जग्गा प्राप्ति ऐन, २०३४ अनुसार कित्ता नम्बर १३५ देखि १४७ सम्मका जग्गाहरू अधिग्रहण गरिने जनाएको छ । सूचना अनुसार सम्बन्धित जग्गाधनी वा सरोकारवाला व्यक्तिहरूले सूचना प्रथम पटक प्रकाशित भएको मिति (२०८२ चैत २४ गते) ले १५ दिनभित्र मुआब्जा दाबी गर्दै जिल्ला प्रशासन कार्यालयमा झापामा निवेदन दिनुपर्नेछ ।
निवेदनका साथमा आफ्नो हकभोग वा स्वामित्व खुल्ने आवश्यक प्रमाणहरू समेत पेस गर्नुपर्ने छ । तोकिएको समय सीमाभित्र निवेदन नदिए कानुन बमोजिम प्रक्रिया अगाडि बढ्ने र पछि कुनै पनि प्रकारको उजुरबाजुर मान्य नहुने प्रशासन कार्यालयले स्पष्ट पारेका छ ।
उक्त सबस्टेसनमार्फत पूर्वी नेपालमा उत्पादित विद्युत् राष्ट्रिय प्रसारण प्रणालीमा जोड्ने लक्ष्य राखेको छ । आयोजनाको निर्माणपछि स्थानीय र राष्ट्रिय स्तरमै विद्युत् वितरण प्रणालीमा सुधार ल्याउने अपेक्षा गरिएको छ । साथै, यस परियोजनाले भारत र बंगलादेशसँगको अन्तरदेशीय विद्युत् व्यापारलाई प्रवर्द्धन गर्ने उद्देश्य राखिएको छ ।
