ऊर्जा खबर
काठमाडौँ । राष्ट्रिय प्रसारण ग्रिड कम्पनी लिमिटेड (आरपिजिसिएल) ले ताप्लेजुङस्थित ढुङ्गेसाँघु सबस्टेसनमा १३२ केभीको ‘बे’ सहितका संरचना विस्तारका लागि बोलपत्र आह्वान गरेको छ । मेवा–चाङ्गे १३२ केभी प्रसारण लाइनलाई उक्त सबस्टेसनमा जोड्न आवश्यक संरचना निर्माण गरिने भएको हो ।
कम्पनीअन्तर्गत सञ्चालित उक्त प्रसारण लाइन आयोजनाले संरचनाको डिजाइन, उपकरणलगायत सामानको आपूर्ति, जडान, परीक्षण तथा सञ्चालनका लागि राष्ट्रियस्तरको बोलपत्र आह्वान गरेको छ । यस कार्यका लागि इच्छुक तथा योग्य राष्ट्रियस्तरका कम्पनीले आवेदन दिन सक्ने कम्पनीले जनाएको छ ।
बोलपत्रमा सहभागी हुन कम्पनीले पछिल्लो १० वर्षमध्ये उत्कृष्ट ३ वर्षको औसत वार्षिक निर्माण कारोबार रकम न्यूनतम १८ करोड रुपैयाँ हुनुपर्ने योग्यताको मापदण्ड राखिएको छ । साथै, निर्माण व्यवसायीसँग कम्तीमा १० करोड ८० लाख रुपैयाँ बराबरको एउटा समान प्रकृतिको आयोजना सफलतापूर्वक सम्पन्न गरेको अनुभव हुनुपर्ने उल्लेख छ ।
कम्पनीको सूचना अनुसार इच्छुक बोलपत्रदाताले १० हजार रुपैयाँ दस्तुर तिरी बोलपत्र कागजात खरिद गर्न सक्नेछन् । विद्युतीय माध्यमबाट बोलपत्र पेस गर्नेले सार्वजनिक खरिद अनुगमन कार्यालयको ई–जिपी प्रणालीमार्फत आवेदन दिनुपर्ने सूचनामा उल्लेख छ ।
आयोजनाले आगामी २०८२ चैत १९ गते दिउँसो १२ बजे पूर्व–बोलपत्र बैठक बस्ने तय गरेको छ । बोलपत्र पेस गर्ने अन्तिम समय २०८३ वैशाख ४ गते दिउँसो १२ बजेसम्म तोकिएको छ भने सोही दिन दिउँसो २ बजे बोलपत्र खोलिनेछ । यसका लागि ४६ लाख रुपैयाँ धरौटी आवश्यक पर्ने कम्पनीले जनाएको छ ।
मेवा–चाङ्गे प्रसारण लाइन आयोजना मेवा खोला र त्यस आसपासका क्षेत्रमा उत्पादन हुने जलविद्युत्लाई राष्ट्रिय प्रसारण प्रणालीमा जोड्न महत्त्वपूर्ण मानिएको छ ।
