विद्युत आपूर्ति : प्राधिकरण :५५८० मे.वा.घन्टा / निजी क्षेत्र :४४३३ मे.वा.घन्टा / आयात : १७८१९ मे.वा.घन्टा / ट्रिपिङ :५० मे.वा.घन्टा / ऊर्जा माग :२७८८२ मे.वा.घन्टा/ उच्च माग :१४३६ मेगावाट
×

रूरूको साधारण सेयर बैशाख पहिलो साता बाँडफाँड हुने, २ प्रतिशत आवेदकले मात्रै १० कित्ता पाउने

२०७७ चैत २५

काठमाडौं । रूरू जलविद्युत परियोजना कम्पनीले बैशाख पहिलो साताभित्र साधारण सेयर बाँडफाँड गर्ने भएको छ । कम्पनीले गुल्मीमा सञ्चालित ५ मेगावाटको माथिल्लो हुग्दी जलविद्युत आयोजनाको सर्वसाधारणका लागि निष्कासन भएकाे सेयर बाँडफाँड गर्ने भएकाे हाे ।

मागभन्दा ६२ गुणा बढी आवेदन परेकाले २ प्रतिशतले मात्रै गाेला प्रथाबाट बाँडिने १० कित्ता सेयर पाउने बिक्री प्रबन्धक एनएमबी क्यापिटलले जनाएकाे छ । क्यापिटलका अनुसार कम्पनीको सेयर किन्न १६ लाख ६९ हजार ५ सय ६६ जनाले २ करोड ३३ लाख ७७ हजार २ सय २० कित्ताका लागि आवेदन दिएका छन् ।

जसमध्ये ३७ हजार ८ सय १६ जना भाग्यशालीले मात्रै १० कित्ता सेयर पाउने छन् । बाँकी १६ लाख २३ हजार ५ सय ५० जना सेयर पाउनबाट बन्चित हुनेछन् । कम्पनीले गत शुक्रबार (चैत २० गते) देखि प्रतिकित्ता १ सय रुपैयाँमा २० रुपैयाँ प्रिमियम थप गरेर १ सय २० रुपैयाँ मूल्यमा सेयर निष्कासन गरेको थियो ।

४ करोड ८९ लाख २४ हजार ७ सय २० रुपैयाँ बराबरको ४ लाख ७ हजार ७ सय ६ कित्ता सेयर बिक्री खुल्ला गरेको थियो । निष्कासन भएको सेयरमध्ये ८ हजार १ सय ५४ कित्ता अर्थात २ प्रतिशत सेयर कर्मचारीका लागि, २० हजार ३ सय ८५ कित्ता अर्थात ५ प्रतिशत सामूहिक लगानी कोषका लागि सुरक्षित गरिएको थियो । बाँकी ३ लाख ७८ हजार १ सय ६७ कित्ता सेयरका लागि सर्वसाधारणका लागि छुट्टाइएको थियो ।

कम्पनीले यसअघि स्थानीयका लागि छुट्याएको ४ करोड ७ लाख ७० हजार ५ सय रुपैयाँ बराबरको ४ लाख ७ हजार ७ सय ५ कित्ता सेयर निष्कासन गरी बाँडफाँड गरिसकेको छ । स्थानीयका लागि भने प्रतिकित्ता सय रुपैयाँमा नै सेयर निष्कासन गरिएको थियो ।

कम्पनीले निर्माण सम्पन्न गरी सञ्चालनमा ल्याएको माथिल्लो हुग्दीले २०७१ चैतदेखि  विद्युत उत्पादन गरिरहेको छ । माथिल्लो हुग्दीमा लगानी गर्ने समूहले नै ८६ मेगावाटको सोलु दूधकोसी जलविद्युत आयोजना पनि निर्माण गरिरहेको छ ।

प्रतिक्रिया