ऊर्जा खबर
काठमाडौं । रसुवामा सञ्चालित २२ मेगावाटको चिलिमे जलविद्युत केन्द्रको विद्युत उत्पादन बन्द भएको छ । प्रवर्द्धक चिलिमे हाइड्रो पावर कम्पनीले विद्युतगृहकाे उपकरण परिवर्तन गर्न उत्पादन बन्द गरेको हो ।
विद्युतगृहमा जडान भएका पुराना उपकरण परिवर्तन गरी नयाँ जडान गर्नका लागि विद्युत उत्पादन बन्द गरिएको जलविद्युत केन्द्र प्रमुख मनिष विष्टले बताए । उनका अनुसार गत २१ गते (शुक्रबार) देखि विद्युतगृह बन्द गरी उपकरण बदली भइरहेको छ ।
‘विद्युतगृहमा जडित उपकरण निकै पुराना भइसकेका थिए । बीचैमा उत्पादन अवरुद्ध हुनसक्ने सक्ने समस्यालाई मध्यनजर गरेर उपकरण बदली गरिरहेका छाैं,’ उनले ऊर्जा खबरसँग भने, ‘आजसम्ममा जडान कार्य सकेर उत्पादन सुरु गर्ने तालिका छ । सम्भव भएसम्म साँझबाट उत्पादन सुचारु हुन्छ ।’
१७ वर्ष अघि जडान गरेका उपकरण पहिलाे पटक बदली गरिएकाे कम्पनीले जनाएकाे छ ।उपकरण बदली गर्न प्राविधक टाेली २४ घन्टा खटिएकाे विस्टले बताए । जलविद्युत केन्द्रले २०६० भदौदेखि विद्युत उत्पादन गर्दै आइरहेकाे छ ।
चिलिमेको सफल निर्माण गरेको कम्पनीले सहायक कम्पनीमार्फत २ सय ७० मेगावाटको ४ अयोजना निर्माण गरिरहेकाे छ । ६ सय ३५ मेगावाटको ३ आयोजना अध्ययनको चरणमा छन् ।
