ऊर्जा खबर
काठमाडौं । नेपाल विद्युत प्राधिकरणले ७ लाख सिंगल फेज विद्युत मिटर खरिद गर्न ठेक्का सम्झौता गरेको छ । प्राधिकरणले घरयासी उपभोक्तालाई सहज र सस्तो मिटर उपलब्ध गराउन भारतीय ठेकेदार कम्पनी जिनस पावर इन्फ्रास्ट्रकचर लिमिटेडसँग सम्झौता गरेको हो ।
घरयासी उपभोक्ताको घरमा जडान गर्ने गरी एकैपटक ७ लाख सिंगल फेज विद्युत मिटर खरिद गर्न सम्झौता गरिएको प्राधिकरणले जनाएको छ । सम्झौतापत्रमा प्राधिकरणका तर्फबाट प्रबन्धक कोमल आचार्य र भारतीय कम्पनीका तर्फबाट प्रतिनधि पुनितले हस्ताक्षर गरे ।
सम्झौता अनुसार ठेकेदार कम्पनीले ठेक्का सम्झाैतामा हस्ताक्षर भएकाे मितिले ५ महिनाभित्र मिटर खरिद गरी प्राधिकरणलाई बुझाउनुपर्नेछ । अबकाे एक महिनाभित्र सिंगल फेज विद्युत मिटर आउन सुरु गर्ने गरिने प्राधिकरणले जनाएको छ । मिटर खरिद गर्न ६४ लाख अमेरिकी डलर (करिब ७६ कराेड ८० लाख रुपैयाँ ) मा सम्झौता भएको छ ।
ग्राहकलाई सस्तो मूल्यमा गुणस्तरिय मिटर उपलब्ध गराउन सिंगल फेज विद्युत मिटर खरिद गर्न लागेको प्राधिकरण वितरण तथा ग्राहक सेवा निर्देशनालयका उप–कार्यकारी निर्देशक मनोज सिलवालले बताए । उनका अनुसार प्राधिकरणले खरिद मूल्यबाहेक कुनै अतिरक्ति मूल्य नलिई ग्राहकलाई सो मिटर उपलब्ध गराउनेछ । प्राधिकरणमा हरेक वर्ष करिब तीन लाख जना नयाँ ग्राहक थपिन्छन् ।
अहिले पनि प्राधिकरण आयोजना व्यवस्थापन निर्देशनालयअन्तर्गत रत्नपार्क र महाराजगन्ज वितरण केन्द्र अन्तर्गत ९० हजार ग्राहकको घरमा स्मार्ट विद्युत मिटर जडान कार्य भइरहेको छ । अहिलेसम्ममा यी वितरण केन्द्र अन्तर्गतका ६५ हजार बढी घरमा स्मार्ट विद्युत मिटर जडान भइसकेको छ । प्राधिकरणले स्मार्ट मिटर जडान गर्ने ग्राहकलाई एसएमएसबाट विद्युतको बिल पठाउने गरेको छ ।
.jpg)
