ऊर्जा खबर
काठमाडौं । आन्तरिक प्रसारण लाइन सुधार तथा नेपाल–भारत विद्युत व्यापार गर्ने उद्देश्यले निर्माणाधीन ४०० केभी हेटौडा–ढल्केबर–इनरुवा डबल सर्किट लाइनको नटबोल्ट चोरी हुँदा ढल्न लागेको टावरको मर्मत सुरु भएको छ । अज्ञात समूहले लाइनको चन्द्रपुर–लमाहा खण्डका तीन वटा टावरको जगकै नटबोल्ट झिकेपछि टावर ढल्ने अवस्थामा पुगेको हो ।
अज्ञात समूहले निर्माणाधीन लाइनको रौतहट खण्डमा पर्ने टावरको जगबाटै नटबोल्टु खोलेपछि टावर ढल्न लागेको आयोजनाले जनाएको छ । टावर ढल्यो भने वरपर वन्यजन्तु र पशुलाई खतरा पुग्ने भएकाले मर्मत सुरु गरिएको छ ।
७९२ वटा टावर निर्माण रहने लाइनको नटबोल्ट चोर्ने समूहको पहिचान गर्ने काम भइरहेको छ । २०७० सालमा सम्झौता भएको आयोजनाको ठेक्का भारतीय एन्जेलिक इन्टरनेशनल लिमिटेड कम्पनीले पाएको छ ।
१७ करोड अमेरिकी डलर अनुमानित लागत रहेको आयोजना नेपाल सरकार, विद्युत प्राधिकरणको लगानी र विश्व बैकको सहुलियतपूर्ण ऋणमा नेपाल–भारत विद्युत प्रसारण तथा व्यापार परियोजना अन्तर्गत सुरु गरिएको हो । आयोजनाबाट विश्व बैंक बाहिरिएको छ । यसबाट मुलुकभित्रको प्रसारण प्रणाली सुदृढीकरण र नेपाल–भारतबीचको विद्युत व्यापार सहज हुने अपेक्षा गरिएको छ ।
