ऊर्जा खबर
काठमाडौँ । गोरखा र लमजुङको सिमानामा ४.२ मेगावाटको च्यांदी खोला जलविद्युत् आयोजना निर्माण हुने भएको छ । यसका लागि च्यांदी खोला हाइड्रोपावर प्रालि विद्युत् विकास विभागमा उत्पादन अनुमतिको माग गर्दै विद्युत् विकास विभागमा आवेदन दिएको छ ।
नदी प्रवाहमा आधारित उक्त आयोजनाका संरचनाहरू गोरखाको अजिरकोट गाउँपालिका–२ र लमजुङको दूधपोखरी गाउँपालिका–१ मा निर्माण हुनेछन् । अन्तर्गत च्यांदी खोलाको पानी फर्काउन समुद्री सतहबाट १७४२ मिटर उचाइमा २३ मिटर लामो बाँध निर्माण गरिने छ । बाँधसँगै च्यांदी खोलामा १.६ मिटर चौडा र ०.५ मिटर उचाइको २ वटा साइड इन्टेक रहने छन् । त्यहाँबाट ल्याइने पानीलाई अन्य संरचनामार्फत १ हजार ७०५ मिटर लामो हेडरेस पाइप हुँदै २० मिटरको उचाइमा रहने सर्ज पाइपसम्म पुर्याइने छ । सर्ज पाइपबाट १ हजार ७४८ मिटर लामो पेनस्टक पाइप हुँदै १२ मिटर चौडाइ र १२ मिटर उचाइ भएको विद्युत्गृहमा पुर्याई विद्युत् उत्पादन गरिने योजना छ । विद्युत्गृहबाट छोडिने पानी २४५ मिटर लामो टेलरेस पाइपबाट पुनः खोलामा छोडिने छ ।
विद्युत्गृहमा २.१ मेगावाट क्षमताका २ वटा विद्युत् उत्पादन युनिट रहने छन् । आयोजनाबाट वार्षिक २५.१९ गिगावाट घण्टा विद्युत् उत्पादन हुने छ । उत्पादन हुने विद्युत् १८ किलोमिटर प्रसारण लाइनबाट नेपाल विद्युत् प्राधिकरणको कीर्तिपुर सबस्टेसनमार्फत राष्ट्रिय प्रसारण प्रणालीमा प्रवाह गर्ने योजना छ ।
