ऊर्जा खबर
काठमाडौं । नेपाल विद्युत प्राधिकरण परासी वितरण केन्द्रले डेढ महिनामा ६० लाख रुपैयाँ बक्यौता असुली गरेको छ । प्राधिकरणले चालु आर्थिक वर्ष २०७८/७९ सुरु भएदेखि हालसम्मको अवधिमा सो बक्यौता असुली गरेको हो ।
लामो समयसम्म विद्युत महसुल नबुझाउने ग्राहकको लाइन काटी बक्यौता असुली गरिएको केन्द्र प्रमुख चुटुन कुमार श्रीवास्तवले बताए । उनका अनुसार महसुल बुझाउन पटक पटक ताकेता गर्दा पनि अटेर गर्ने ग्राहकको लाइन काटि बक्यौता असुली सुरु गरिएको हो । दुई महिना भन्दा बढी समयदेखि विद्युत महसुल नबुझाउने ग्राहकको लाइन काटी बक्यौता असुली अभियानलाई तिव्र गतिमा अघि बढाइएको छ ।
‘केन्द्र अन्तर्गत विद्युत महसुल खपत बापत दुई अर्ब बढी रकम उठाउन बाँकि छ,’ उनले भने, ‘जसमा डेडिकेटेड र ट्रकं लाईनबाट विद्युत सेवा लिने ठूला उद्योगको मात्रै झण्डै डेढ अर्ब रुपैयाँ महशुल उठ्न बाँकि छ ।’
केन्द्रले विद्युत महसुल संकलन अभियानलाई तिव्र गतिमा अघि बढाएको छ । पहिलो चरणमा एक लाख रुपैयाँसम्म तिर्न बाँँकी हुनेको लाईन काटिनेछ, दोस्रो चरणमा ५० हजारसम्मको लाइन काटि बक्यौता असुल गरिने केन्द्रले जनाएको छ ।
केन्द्रले गत आर्थिक वर्षमा एक करोड २० लाख रुपैयाँ महसुल असुल गरेको थियो । केन्द्र अन्तर्गत प्राधिकरणको विद्युत उपयोग गर्ने ४४ हजार ग्राहक छन् ।
