ऊर्जा खबर
काठमाडाैं । निलगंगा हाइड्रो पावर कम्पनी प्रालिले रामेछापकाे गाेकुलगंगा गाउँपालिका र दाेलखाकाे जिरी नगरपालिकामा अवस्थित खिम्ती-घ्वाङखोलामा ९ मेगावाटकाे साना जलविद्युत् आयोजना निर्माण गर्ने भएकाे छ ।
कम्पनीले आयोजना निर्माण अघि बढाउन विद्युत विकास विभागसमक्ष उत्पादन अनुमतिपत्र माग गर्दै आवेदन दिएको छ । विभागले अनुमति दिने प्रक्रिया अन्तिम चरणमा पुर्याएको छ । विभागले कम्पनीकाे नाममा अनुमति जारी गर्न बिहीबार सूचना प्रकाशित गर्दै आयोजना निर्माण र सञ्चालन गर्दा कुनै प्रतिकूल असर पर्ने भए ३५ दिनभित्र लिखित राय/सुझाव पेस गर्न आग्रह गरेकाे छ ।
आयोजनाकाे प्रारम्भिक वावतरण अध्ययन प्रतिवेदन अनुसार आयोजनाकाे मुख्य संरचनाकाे खिम्ती खाेलाकाे बायाँ किनारमा निर्माण हुनेछ । १४९६ मिटर लामाे पाइपलाइनमार्फत पानीलाइ विद्युतगृहमा पुर्याइनेछ । विद्युतगृहमा जडित टर्वाइनसँग जाेडिएकाे जेनेरेटरमार्फत विद्युत उत्पादन हुनेछ ।
आयोजनाबाट वार्षिक सरदर ५०.०७ गिगावाट घण्टा विद्युत् उत्पादन हुनेछ । उत्पादित विद्युत ३३ केभी लाइनमार्फत ५.५ किलाेमिटर दुरीमा रहेकाे नेपाल विद्युत प्राधिकरणकाे गर्जाङ सबस्टेसनमा जाेडिनेछ । प्रतिवेदन अनुसार आयोजनाबाट २०८१ चैतसम्म विद्युत् उत्पादन गर्ने लक्ष्य राखिएको छ ।
