ऊर्जा खबर
काठमाडौं । सरकारले अमेरिकी वैदेशिक सहायता एजेन्सी मिलेनियम च्यालेन्ज कर्पोरेशन (एमसीसी) को अनुदानमा निर्माण हुने ४०० केभी प्रसारण लाइनको टावर निर्माणका लागि आवश्यक पर्ने जग्गाको मुआब्जा तथा क्षतिपूर्ति दावी पेस गर्न आग्रह गरेको छ । लाइनको रातमाटे सबस्टेसनदेखि नयाँ दमौली सबस्टेसन खण्ड अन्तर्गत पर्ने जग्गाको मुआब्जा तथा क्षतिपूर्ति दावी पेस गर्न माग गरेको हो ।
यो खण्डमा पर्ने चितवन इच्छाकामना गाउँपालिकामा अधिग्रहण गरिने जग्गाको मुआब्जा तथा क्षतिपूर्ति दावी माग गरिएको छ । जिल्ला प्रशासन कार्यालय चितवनले आइतबार (साउन २१ गते) सुचना जारी गर्दै मिलेनियम च्यालेन्ज एकाउन्ट नेपाल विकास समितिले कार्यान्वयन गरिरहेको लाइनको टावर निर्माण गर्न अधिग्रहण गर्नुपर्ने जग्गाको मुआब्जा तथा क्षतिपूर्ति दावी पेस गर्न सम्बन्धित जग्गा धनीलाई आग्रह गरेको छ ।
जग्गा प्राप्ति ऐन २०३४ को दफा ९ को उपदफा १ को प्रयोजन र जग्गाको मुआब्जा तथा क्षतिपूर्ति दावी गर्न आ–आफ्नो हकमा रहेको वा भोगचलन गर्दै आएको जग्गाको मुआब्जा तथा क्षतिपूर्ति दावी गर्न निवेदन दिनुपर्ने छ । प्रभावितले आगामी २१ दिनभित्र आवेदन दिइसक्नु पर्नेछ ।
जग्गा धनीले टावर निर्माण हुने जग्गाको मुआब्जा तथा घरटहरा, गोठ, रुख विरुवा एवं प्रसारण लाइनको तार मुनिको जग्गाको क्षतिपूर्ति पाउने छन् ।
