सौर्य मिनी ग्रिड बनाउन वैकल्पिक ऊर्जा र ग्लोबल आइएमईबीच सम्झौता

काठमाडौं । वैकल्पिक ऊर्जा प्रवर्द्धन केन्द्र र ग्लोबल आइएमई बैंकबीच विभिन्न सौर्य मिनी ग्रिड परियोजनाहरू निर्माण गर्न सम्झौता भएको छ । बुधबार (हिजो) केन्द्र र बैंकबीच निजी क्षेत्रको नेतृत्वमा मिनी ऊर्जा परियोजना सम्बन्धमा सहायक ऋण सम्झौता भएको हो ।

सम्झौता अनुसार आयोजना कार्यान्वनका लागि केन्द्रले बैंकलाई रकम उपलब्ध गराउनेछ । उक्त रकम बैंकले १०० किलोवाट सौर्य मिनी ग्रिड परियोजना निर्माण, जडान तथा विद्युत वितरण कार्यको लागि ऋणको रूपमा उपलव्ध गराउनेछ ।

सम्झौतापत्रमा बैंकका तर्फबाट प्रमुख कार्यकारी अधिकृत रत्नराज बज्राचार्य र केन्द्रका तर्फबाट कार्यकारी निर्देशक डा.मधुसुधन अधिकारीले हस्ताक्षर गरे । बैंकले यस्ता किसिमका परियोजनाहरूमा लगानी गर्नुका साथसाथै साना तथा मझौला व्यवसायलाई प्रवर्द्धन गर्न कार्यक्रमहरू सञ्चालन गरिरहेको छ ।

बैंकले मुलुकभर तथा मुलुक बाहिर गरी सबै क्षेत्र र वर्गसम्म बैंकिङ सेवाको पहुँच पुर्याउने उद्देश्यले ७६ जिल्लामा २८८ शाखा, २५२ एटिएम, २७५ शाखा रहित बैंकिङ सेवा, ५१ एक्सटेन्सन तथा राजश्व संकलन काउन्टर र ३ वटा वैदेशिक प्रतिनिधि कार्यालय समेत गरी करिब ८७० सेवा केन्द्रबाट बैंकिङ सेवा उपलब्ध गराउँदै छ ।

त्यसैगरी बैंकले संयुक्त राज्य अमेरिका, संयुक्त अधिराज्य, क्यानेडा, अष्ट्रेलिया, मलेसिया, दक्षिण कोरिया, जापान, साउदी अरेबिया, कतार, युएई, बहराइन, कुवेत, भारत, जोर्डन, हङकङ लगायतका मुलुकबाट रेमिट्यान्स भित्राउँदै देशको अर्थ व्यवस्थामा महत्वपूर्ण योगदान पुर्याइरहेको छ ।