ऊर्जा खबर
काठमाडौं । रुरु जलविद्युत परियोजना लिमिटेडको साधारण सेयर भर्ने आज (मंगलबार) अन्तिम दिन हो । कम्पनीले गत शुक्रबार (२० गते) बाट गुल्मीमा सञ्चालित ५ मेगावाटको माथिल्लो हुग्दी जलविद्युत आयोजनाको सर्वसाधारणका लागि छुट्याएको सेयरको बिक्री खुलाएकोमा आवेदन दिने अवधि आज साँझ ५ बजेबाट सकिन लागेको हो ।
कम्पनीको सेयर भर्न लगानकर्ताको उत्साहजनक सहभागिता देखिएको छ । सोमबार कार्यालय समयसम्मको तथ्यांकअुसार १३ लाख ८ हजार ९ सय ८५ आवेदकले १ करोड ८७ लाख ६५ हजार ६ सय कित्ता सेयर खरिद गर्न आवेदन दिइसकेका कम्पनीले जनाएको छ । यो मागभन्दा ४९.६२ गुणा बढी हो ।
कम्पनीले प्रतिकित्ता १ सय रुपैयाँमा २० रुपैयाँ प्रिमियम थप गरेर १ सय २० रुपैयाँ मूल्यमा सेयर निष्कासन गरेको छ । ४ करोड ८९ लाख २४ हजार ७ सय २० रुपैयाँ बराबरको ४ लाख ७ हजार ७ सय ६ कित्ता सेयर बिक्री खुल्ला गरेको छ ।
निष्कासित सेयरमध्ये ८ हजार १ सय ५४ कित्ता अर्थात २ प्रतिशत सेयर कर्मचारीका लागि, २० हजार ३ सय ८५ कित्ता अर्थात ५ प्रतिशत सामूहिक लगानी कोषका लागि सुरक्षित गरिएको छ । बाँकी ३ लाख ७८ हजार १ सय ६७ कित्ता सेयरका लागि सर्वसाधारणका लागि छुट्टाइएको छ ।
सर्वसाधारणले न्युनतम १० कित्तादेखि अधिकतम निष्कासित सबै कित्ताका लागि आवेदन दिन पाउने छन् । सेयर निष्कासन गरी बाँडफाँड गर्न एनएमबी क्यापिटललाई बिक्री प्रबन्धक तोकिएको छ ।
कम्पनीले यसअघि स्थानीयका लागि छुट्याएको ४ करोड ७ लाख ७० हजार ५ सय रुपैयाँ बराबरको ४ लाख ७ हजार ७ सय ५ कित्ता सेयर निष्कासन गरी बाँडफाँड गरिसकेको छ । स्थानीयका लागि भने प्रतिकित्ता सय रुपैयाँमा नै सेयर निष्कासन गरिएको थियो ।
कम्पनीले निर्माण सम्पन्न गरी सञ्चालनमा ल्याएको माथिल्लो हुग्दीले २०७१ चैतदेखि विद्युत उत्पादन गरिरहेको छ । माथिल्लो हुग्दीमा लगानी गर्ने समूहले नै ८६ मेगावाटको सोलु दूधकोसी जलविद्युत आयोजना पनि निर्माण गरिरहेको छ ।
