ऊर्जा खबर
काठमाडौं । ग्रीन भेन्चर्स लिमिटेडले आगामी फागुन २ गतेदेखि साधारण सेयर निष्कासन गर्ने भएको छ । कम्पनीले रामेछापमा निर्माण सम्पन्न ५२.४ मेगावाटको लिखु–४ जलविद्युत आयोजनाको प्रभावित स्थानीयका लागि सेयर निष्कासन गर्न लागेको हो ।
सय रुपैयाँमा अंकित ३१ करोड २५ लाख रुपैयाँ बराबरको ३१ लाख ५० हजार कित्ता साधारण सेयर निष्कासन गर्ने तयारी गरेको कम्पनीले जनाएको छ । कम्पनीका अनुसार ओखलढुङ्गाको खिजिदेम्बा गाउँपालिका वडा नम्बर १, २ र ३, लिखु गाउँपालिका ९, रामेछापको लिखु तामाकोशी गाउँपालिका १ र २ र उमाकुण्ड गाउँपालिका ७ का बासिन्दाहरुका लागि सेयर निष्कासन गर्न लागिएको हो ।
लगानीकर्ताले न्युनतम १० कित्तादेखि अधिकतम ५० हजार कित्तासम्म आवेदन दिन पाउनेछन् । स्थानीयले छिटोमा फागुन १६ गतेसम्म र ढिलोमा चैत १ गतेसम्म आवेदन दिन सक्नेछन् ।
कम्पनीले पहिलो चरणमा आयोजना प्रभावित क्षेत्रका स्थानीयबासी र दोस्रो चरणमा सर्वसाधारणका लागि सेयर निष्कासन गर्ने तयारी गरेको छ ।
कम्पनीले सेयर निष्कासन गरी बाँडफाँड गर्न लक्ष्मी क्यापिटल लिमिटेडलाई बिक्री प्रबन्धक तोकेको छ । स्थानीयले लक्ष्मी बैंकको मन्थली शाखा, नेपाल इन्भेष्टमेन्ट बैंकको धोबिबजार, आयोजना स्थल र मेगा बैंकको खिजिदेम्बा तथा मन्थली शाखा कार्यालयबाट आवेदन दिन सक्नेछन् ।
यसका साथै नेपाल धितोपत्र बोर्डबाट स्वीकृतिप्राप्त गरेका सम्पूर्ण सी–आस्वा सदस्य बैंक तथा वित्तीय संस्था र तिनका शाखा कार्यालयबाट आवेदन दिन सकिनेछ ।
कम्पनीले रामेछापको लिखु नदीमा निर्माण गरेको लिखु–४ आयोजना सम्पन्न भई सञ्चालनमा आइसकेको छ । आयोजनाले अहिले व्यापारिक विद्युत उत्पादन गरिरहेको छ । यो आयोजना ९ अर्ब ५४ करोड रुपैयाँ लागतमा सम्पन्न भएको हो ।
