मैलुङ खोलाले ७ लाख कित्ता सेयर निष्कासन गर्न बाेर्डकाे अनुमति पायो

काठमाडौं । मैलुङ खोला जलविद्युत कम्पनीले ७ लाख ३६ हजार २ सय ८६ कित्ता सेयर निष्कासन गर्न नेपाल धितोपत्र बोर्डबाट अनुमति पाएको छ । बोर्डले रसुवामा सञ्चालित ५ मेगावाटको मैलुङ खोला जलविद्युत आयोजनाको सर्वसाधारका लागि छुट्याएको साधारण सेयर निष्कासन अनुमति दिएको हो ।

सय रुपैयाँ अंकित ७ करोड ३६ लाख २८ हजार ६ सय रुपैयाँ बराबरको सेयर निष्कासन अनुमति पाएको कम्पनीले जनाएको छ । कम्पनीका अनुसार अब छिट्टै सेयर निष्कासन गरी बाँडफाँड गरिनेछ ।

कम्पनीको सेयर निष्कासन गरी बाँडफाँड गर्न सिद्धार्थ क्यापिटल लिमिटेडलाई बिक्री प्रबन्धक चयन गरिएको छ । कम्पनीले यसअघि आयोजना प्रभावित स्थानीयका लागि छुट्याएको निष्कासन गरी बाँडफाँड गरिसकेको छ ।

यो कम्पनीले ३ वर्षदेखि बोर्डको स्वीकृति पर्खिरहेको थियो । कम्पनीले २०७४ माघ १८ गते आवेदन दिएको थियो । यो कम्पनीले आवेदन दिएको साढे ३ वर्ष पछि  सेयर निष्कासनको अनुमति पाएको हो ।कम्पनीले निर्माण सम्पन्न गरी सञ्चालनमा ल्याएको आयोजनाले २०७१ असार १९ गतेदेखि विद्युत उत्पादन गरिरहेको छ ।