ऊर्जा खबर
काठमाडौँ । रुकुमपूर्वको पूर्ण हिमाली क्षेत्रमा पर्ने दुई गाउँपालिकामा विद्युतीकरण गरिएकाे छ । पुथा उत्तरगंगा गाउँपालिकाको वडा नम्बर १२ मा पर्ने क्युवाङदेखि कोल हुँदै वडा नम्बर १४ मा पर्ने राङसीसम्म विद्युतीकरण गरिएको हाे । राङसीमा ५० केभीएको ट्रान्सफर्मर राखी करिब १० किलोमिटर लामो ११ केभीको लाइन विस्तार गरी सो ठाउँमा विद्युतीकरण गरिएको रुकुमपूर्व वितरण केन्द्रका प्रमुख प्रमोद खनालले ऊर्जा खबरलाई बताए ।
उनका अनुसार कोलमा ५० केभीए, गरखानीमा २५ केभीए, क्युवाङमा २५ केभीए गोलखाडामा २५ केभीए ट्रान्सफर्मर राखी विद्युत् वितरण गरिएको छ । लाइन विस्तारपछि यस स्थानका करिब १ हजार घरधुरी ग्राहक परिवार लाभान्वित भएको उनले बताए । यो लाइन पश्चिम रुकुमको भैरेनी चौर सबस्टेशनबाट लगिएको हो ।
त्यस्तै, लुम्बिनी प्रदेशकै हिमपात हुने पर्यटकीय सम्भावना बोकेको रोल्पा र वाग्लुङको सीमानामा पर्ने रुकुमपूर्वको भूमे गाउँपालिका–१ पातीहाल्नेमा करिब ८ किलोमिटर ११ केभी लाइन विस्तार गरी २५ केभीको ट्रान्सफर्मरमार्फत त्यस क्षेत्रका होटल व्यवसायीलाई विद्युत् वितरण गरिएको छ । यो लाइनबाट भविष्यमा यस क्षेत्रमा सौर्य ऊर्जाबाट चलिरहेको नेपाल टेलिकमको टावरलाई समेत विद्युत् सेवा पुग्ने छ ।
बाग्लुङमा निर्माणाधीन बुर्तिवाङ सबस्टेशन १३२/३३ केभीलाई स्रोत लाइन बनाएर भविष्यमा यस क्षेत्रमा विद्युत् ल्याउन सकिने उनले बताए ।
