ऊर्जा खबर
काठमाडौं । लमजुङको दोर्दी गाउँपालिकाको छ्याङ्दी खोलामा निर्माण सम्पन्न ४ मेगावाटको माथिल्लो छ्याङ्दी खोला जलविद्युत आयोजनाको आन्तरिक परीक्षण पूरा भएको छ । २०७६ वैशाख देखि निर्माण सुरु भएको आयोजना सम्पन्न गरी आन्तरिक परिक्षण पूरा भएको हो ।
आयोजनाको संरचनामा पानी भरेर परीक्षण गरेको छ्याङदी हाइड्रोपावर कम्पनीका कार्यकारी अधिकृत एलबी थापाले बताए । ‘आयोजना सम्पन्न भएपछि एक चरणको परीक्षण पूरा गरेका छौं,’ उनले ऊर्जाखबरसँग भने, ‘अब नेपाल विद्युत प्राधिकरणको प्राविधिक टोलीले परीक्षण गरेपछि ग्रिडमा जोडिनेछ ।’
नेपाल विद्युत् प्राधिकरणसँग भएको विद्युत् खरिद सम्झौता (पिपिए) अनुसार आयोजनाबाट २०७८ साउनदेखि विद्युत् उत्पादन गर्ने तालिका थियो । तर, विभिन्न समयमा भएको बाढी र पहिरोजस्ता विपद्जन्य घटनाले निर्माणमा ढिलाइ भएको आयोजनाले जनाएको छ ।
अब, आयोजनाको आन्तरिक परिक्षण सफल भएकोले असोजको पहिलो साताभित्र उत्पादन सुरु गर्ने योजना छ । आयोजनाबाट उत्पादन भएको विद्युत प्राधिकरणको उदिपुर सबस्टेसनमा जडान गरी राष्ट्रिय प्रसारण लाइनमा जोडिनेछ ।
आयोजना ८० करोड ३५ लाख रुपैयाँमा निर्माण पूरा भएको छ । आयोजनामा बैंक अफ काठमाडौं र कुमारी बैंकले ७५ प्रतिशत ऋण लगानी गरेका छन् । बाँकी २५ प्रतिशत स्वपुँजी लगानी गरेका छ ।
प्राधिकरणको नयाँ मापदण्डअनुसार बर्खायाममा प्रतियुनिट ४.८० पैसा र हिउँदमा प्रतियुनिट ८.४० पैसाको दरमा पीपीए भएको आयोजनाले जनाएको छ । आयोजनाबाट वार्षिक २२.३०६ गिगावाट घन्टा विद्युत् उत्पादन गर्नेछ ।
