ऊर्जा खबर
काठमाडौँ । माछापुच्छ्रे बैंकले लिमिटेडले सिन्धुपाल्चोकमा निर्माण हुने १ मेगावाटको हाँडीखोला सुनकोसी ‘ए’ साना जलविद्युत आयोजनामा एकल लगानी गर्ने भएको छ । सेन्चुरी इनर्जी कम्पनी प्रालिले निर्माण गर्ने आयोजनामा बैंक एक्लैले ऋण लगानी गर्न लागेको हो ।
बैंक र कम्पनीबीच सोमबार ऋण लगानी सम्झौतामा हस्ताक्षर भएको छ । आयोजनामा बैंकले १५ करोड रुपैयाँ लगानी गर्ने कम्पनीका अध्यक्ष डा. कृष्णप्रसाद दुलालले बताए । उनका अनुसार कुल २२ करोड रुपैयाँ लागत अनुमान गरिएको आयोजनामा ७ करोड रुपैयाँ बराबरको स्वपुँजी लगानी रहनेछ ।
अध्ययन पूरा भएको आयोजनाको निर्माण एक महिनाभित्र सुरु गर्ने गरी ठेकेदार छनाेट प्रक्रिया अन्तिम चरणमा पुगेको पनि दुलालले बताए । १५ महिना अवधिमा सम्पन्न गर्ने लक्ष्य राखिएको आयोजनाबाट २०७६ चैतभित्र विद्युत उत्पादन हुने उनकाे दाबी छ । आयोजनाबाट उत्पादन हुने विद्युत् विद्युतगृह नजिकैको ११ केभी घोरथली वितरण लाइनमा जोडिने कम्पनीले जनाएको छ । उत्पादित विद्युत वितरण प्रणालीमा जोड्न ११ केभी क्षमताको स्वीचिङ स्टेसन निर्माण गरिनेछ ।
.jpg)
