ऊर्जा खबर
काठमाडौं । इन्टिग्रेटेड हाइड्रो फण्ड नेपाल प्रालिले १५.१५ मेगावाटको अप्पर ब्रम्हायणी जलविद्युत आयोजना निर्माण गर्ने भएको छ । कम्पनीले सिन्धुपाल्चोक जिल्लाको जुगल गाउँपालिकामा पहिचान भएको आयोजना अघि बढाउन लागेको हो ।
गाउँपालिका वडा नम्बर २ र ३ मा पर्ने न्याम्ना मसाल खोलाको पानी उपयोग गरी आयोजना निर्माण गर्न लागेको कम्पनीले जनाएको छ । कम्पनीका अनुसार आयोजनाको वातावरणीय प्रभाव मूल्यांकन (इआइए) प्रतिवेदन तयार भइसकेकाे छ । कम्पनीले प्रतिवेदन स्वीकृतिका लागि वन तथा मन्त्रालयमा पठाएकाे छ ।मन्त्रालयले प्रतिवेदनमाथि सराेकारवालासँग लिखित राय/सुझाव माग गरेकाे छ । इच्छुकले ७ दिनभित्र आइपुग्ने गरी आफ्नाे राय पठाउनुपर्नेछ ।
प्रस्तावित आयोजनाको डिजाइन डिस्चार्ज ४.०२ घनमिटर प्रतिसेकेण्ड र ग्रस हेड ४६३.०० मिटर र नेट हेड ४४४.४४ मिटर हुने गरी प्रस्ताव गरिएकाे छ । आयोजनाबाट वार्षिक ८९.०९ गिगावाट घण्टा विद्युत उत्पादन हुनेछ । वर्षायाममा ६२.३३ गिगावाट घन्टा र सुख्खायाममा २६.७२ गिगावाट घन्टा विद्युत उत्पादन हुनेछ ।
आयोजनाको मुख्य संरचनाहरूमा वेयर, अण्डरस्लुइस, इन्टेक, ग्राभेल ट्रयाप, एप्रोच क्यानल, सेटलिङ बेसिन, हेडरेस पाइप, हेडरेस टनेल, सर्जसाफ्ट, प्रेसर टनेल, पेनस्टक पाइप, विद्युत गृह तथा टेलरेस क्यानल रहेका छन् । आयोजनाको लागि कुल ८.८ हेक्टर जग्गा आवश्यक पर्नेछ ।
