न्यासेम खोलाको निर्माण सुरु हुँदै, साढे २ वर्षमा विद्युत उत्पादनको लक्ष्य 

काठमाडौं । ३५ मेगावाटको न्यासेम खोला जलविद्युत आयोजनाको निर्माण अबको एक महिनामा सुरु हुने भएको छ । सिन्धुपाल्चोकमा पहिचान भएको आयोजना निर्मणमा जान लागेको हो ।

अहिले आयोजना स्थलसम्म पुग्ने पहुँच सडक र आवसगृह निर्माण भइरहेको प्रवद्र्धक सीता हाइड्रो पावर कम्पनीका अध्यक्ष सीताराम तिम्सिनाले बताए । ‘आयोजनाका लागि लगानी जुटिसकेको छ,’ उनले ऊर्जा खबरसँग भने, ‘पहुँच सडक र कर्मचारी बसोबास गर्ने घर निर्माणपछि आयोजनाको संरचना निर्माणको काम सुरु हुन्छ ।’

उनले आयोजनाको संरचना निर्माणको काम सुरु गर्न ठेकेदार छनोटको प्रक्रिया अन्तिम चरणमा पुगेको बताए । आयोजना निर्माण गर्न ६ अर्ब ३४ करोड रुपैयाँ लागत अनुमान गरिएको छ ।

कूल लागतको ७५ प्रतिशत बैंकको लगानी हुनेछ । आयोजनामा सानिमा बैंकको अगुवाईमा ४ अर्ब ७२ करोड ऋण लगानी गर्ने सम्झौता भइसकेको पनि तिम्सिनाले बताए । 

आयोजनामा सानिमासहित, हाइड्रो पावर इन्भेष्टमेन्ट एण्ड डेभलपमेन्ट कम्पनी (एचआइडिसिएल) एसबिआई र ग्लोबल आइएमई गरी ४ बैंक तथा वित्तीय संस्थाले लगानी गर्दैछन् । २५ प्रतिशत स्वपुँजी लगानी छ ।

कम्पनीले नेपाल विद्युत प्राधिकरणसँग गरेको विद्युत खरिद सम्झौता (पिपिए) अनुसार २०८० साल असार १५ गतेबाट व्यावसायिक विद्युत उत्पादन सुरु गर्ने तालिका छ । आयोजनाले उत्पादन गर्ने विद्युत पाङटाङ सबस्टेसनमा जोडिनेछ ।

आयोजनाको विद्युतगृहबाट सबस्टेसनसम्म आवश्यक ९ किलोमिटर प्रसारण लाइन कम्पनीले निर्माण गर्नेछ । यो आयोजनामा लगानी गर्ने समूहले यसअघि २२ मेगावाटको तल्लो हेवा जलविद्युत आयोजनाको सफल निर्माण गरी राष्ट्रिय प्रसारण प्रणालीमा जोडिसकेको छ ।