ऊर्जा खबर
काठमाडौं । मान्डु हाइड्रो पावर लिमिटेड र मिड सोलु हाइड्रो पावर लिमिटेडले सेयर निष्कासन अनुमति पाएको छ । कम्पनीले असार १८ गते (सोमबार) प्रभावित स्थानीय र सर्वसाधारणका लागि छुट्याएको सेयर निष्कासन गर्न अनुमति पाएको हो ।
मान्डु हाइड्रो पावर कम्पनी लिमिटेडले जारी पूँजी ३३ करोड ७० लाख ९२ हजार २ सय २० रुपैयाँ रकम बराबरको सय रुपैयाँ अंकितमा १०६ रुपैयाँ प्रिमियम थप गरी प्रतिकित्ता २०६ रुपैयाँका दरले १६ लाख ३६ हजार ३ सय ७० कित्ता सेयर निष्कासन गर्ने अनुमति पाएको छ । कम्पनीले पहिलो चरणमा प्रभावित स्थानीय र वैदेशिक रोजगारीमा गएका नेपाली नागरिकका लागि निष्कासन तथा बाँडफाँड गरी दोस्रो चरणमा सर्वसाधारणका लागि निष्कासन गरिनेछ ।
कम्पनीको सेयर निष्कासन गरी बाँडफाँड गर्न प्रभु क्यापिटल लिमिटेडलाई बिक्री प्रबन्धक तोकिएको छ । कम्पनीको २२ मेगावाटको बागमती जलविद्युत आयोजनाले निरन्तर विद्युत उतपादन गरिरहेको छ ।
यसैगरी, मिड सोलु हाइड्राले पावरले जारी पूजी १४ करोड ९६ लाख ८० हजार रकम बराबरको सय रुपैयाँ अंकित १४ लाख ९६ हजार ८ सय कित्ता साधरण सेयर निष्कासन गर्ने अनुमति पाएको छ । कम्पनीको सेयर निष्कासन गरी बाँडफाँड गर्न एनआईसी एसिया क्यापिटल लिमिटेडलाई बिक्री प्रबन्धक तोकिएको छ । कम्पनीको सोलुखुम्बुमा ९.५ मेगावाटको मध्य सोलु जलविद्युत आयोजना निर्माणाधीन छ ।
