ऊर्जा खबर
काठमाडौँ । वैकल्पिक ऊर्जा प्रवर्द्धन केन्द्रले काठमाडौँ उपत्यका बाहिरबाट उपत्यकामा आई घरभाडामा बसेर स्नातक वा सोभन्दा माथिल्लो तहमा अध्ययन गर्ने विद्यार्थीलाई विद्युतीय चुलो वितरण गर्ने भएको छ ।
खाना पकाउने एलपी ग्यासको मूल्य बढ्दो क्रममा रहेकोले त्यसबाट राहत महसुस गराउन र विद्युतीय चुलोको प्रवर्द्धन गराउन यस्तो कार्यक्रम ल्याइएको केन्द्रले जनाएको छ ।
केन्द्रका अनुसार विद्युतीय चुलो लिनका लागि नेपाली नागरिकताको प्रमाण पत्र, शिक्षण संस्थाको सिफारिस र विद्यार्थी परिचयपत्रको प्रतिलिपि सहित केन्द्रमा आवेदन दिनु पर्नेे छ ।
आवेदन दिएका मध्ये अति दुर्गम र दुर्गम स्थानबाट आएका विद्यार्थीलाई प्राथमिकता दिइने जनाइएको छ । यसका लागि अनलाइन मार्फत फारम डाउनलोड गरी अनलाइन फारम समेत भर्न सकिने छ ।
यसअघि यहि कार्यक्रम मार्फत इन्डक्सन प्राप्त गरेका विद्यार्थीको आवेदन स्वीकार नहुने पनि केन्द्रले जनाएको छ ।
