राप्ती हाइड्रोको साधारणसभा जेठ ९ मा, सेयर निष्कासन प्रस्ताव पारित गर्ने

काठमाडौं । राप्ती हाइड्रो एण्ड जनरल कन्स्ट्रक्सन कम्पनीको साधारणसभा जेठ ९ गते हुने भएको छ । कम्पनीको गत बैशाख १९ गते बसेको सञ्चालक समितिको बैंठकले साधारणसभाको मिती तय गरेको हो ।

 साधारणसभाले २०७५/७६ र ७६/७७ को वार्षिक प्रतिवेदन, वित्तीय वितरण, नाफा/नोक्सान हिसाब नगद प्रवाहा विवरणमा छलफल गरी पारित गर्नेछ । साथै, २०७७/७८ का लागि लेखा परीक्षक नियुक्त गरी पारिश्रमिक निर्धारण गर्नेछ ।

साथै, रुकुमको सिस्नेमा निर्माणाधीन ५ मेगावाटको रुकुमगाड जलविद्युत आयोजनाको साधारण सेयर निष्कासनको विषयमा पनि निर्णय गरी पारित गर्ने कम्पनीले जनाएको छ । साधारणसभा विद्युतीय माध्यम (भर्जुअल) बाट हुनेछ ।

८० प्रतिशत निर्माण पूरा भएको आयोजनाले आगामी असोजदेखि विद्युत उत्पादन सुरु गर्ने कम्पनीले जनाएको छ । उत्पादीत विद्युत २१ किलोमिटर दुरीमा रहेको नेपाल विद्युत प्राधिकरणको मुसीकोट सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनीले आफैले निर्माण गर्दैछ ।

आयोजना सम्पन्न गर्न १ अर्ब रुपैयाँ लागत अनुमान गरिएको छ । आयोजनामा प्राइमको अगुवाईमा सेन्चुरी र कुमारी बैंकले ७० प्रतिशत ऋण लगानी गरेका छन् । बाँकी स्वपुँजी छ ।