मध्य होंगु खोलाको विद्युत् प्रसारण गर्न गौरीशंकर पावरले १३२ केभीको लाइन निर्माण गर्ने

काठमाडौँ । सोलुखुम्बुको सोताङ गाँउपालिका–४ मा गौरीशंकर पावर डेभलपमेन्ट लिमिटेडले १३२ केभी को डबल सर्किट विद्युत् प्रसारण लाइन निर्माण गर्ने भएको छ । कम्पनीले प्रवर्द्धन गर्न लागेको २२.९ मेगावाटको मध्य होंगु खोला ‘बि’ जलविद्युत् आयोजनाको कम्पनीले सो प्रसारण लाइन निर्माण गर्न लागेको हो ।

कम्पनीका अनुसार उक्त प्रसारण लाइन मध्य होंगु खोला ‘बि’को स्वीचयार्डदेखि सोही जिल्लाको महाकुलुङ, थुलुङ दुधकोशी गाँउपालिका हुँदै सोलुदुधकुण्ड नगरपालिका–११ मा रहेको नेपाल विद्युत् प्राधिकरणको तिङ्गला सबस्टेसनसम्म प्रसारण लाइन निर्माण हुनेछ । २५.७९ किलोमिटर लम्बाइ हुने यस प्रसारण लाइनअन्तर्गत ७८ वटा टावरहरू निर्माण गरिने कम्पनीाको योजना छ । 
 
कम्पनीका अनुसार लाइन निर्माणका लागि कुल ४६.४३५९ हेक्टर जमिन आवश्यक पर्ने र त्यसमध्ये ७८ वटा टावरका मात्र २.०४२९ हेक्टर जग्गा आवश्यक पर्ने उल्लेख छ । यसबाहेक विद्युत् मार्गको अधिकार क्षेत्रभित्र अन्तर्गत ४४.३९३० हेक्टर जग्गा आयोजना निर्माणका लागि आवश्यक पर्ने छ । उक्त प्रसारण लाइनको निर्माण १८ महिनाभित्र पूरा गर्ने लक्ष्य राखिएको छ ।