ठेउले खोला जलविद्युत् केन्द्रको उत्पादन पुनः सुचारु हुँदै

काठमाडौँ । बाग्लुङको जैमिनी नगरपालिकास्थित ठेउले खोला जलविद्युत् केन्द्रको उत्पादन पुनः सुचारु हुने भएको छ । अविरल वर्षसँगै असार २३ गते आएको पहिरोले जलविद्युत् केन्द्रको बाँध क्षेत्रमा पर्ने इन्टेक गेटदेखि ग्राभेल ट्रापसम्मको भागमा लेदो तथा गेग्रान भरिएसँगै उत्पादन ठप्प भएको थियो । पहिरो आएको ८ दिनमै माटो हटाएर उत्पादन पुनः सुचारु गर्ने अवस्थामा ल्याउन सफल भएको केन्द्रले जनाएको छ । सोमबार साँझबाटै उत्पादन सुरु गर्ने तयारी भइरहेको केन्द्रले जनाएको छ ।

केन्द्रका अनुसार संरचनालाई छोपेको माटो तथा गेग्रयान हटाउन २५ जना कामदार तथा स्काभेटर २ सिफ्टमा परिचालन गरिएको थियो । १.५ मेगावाट क्षमताको उक्त जलविद्युत् केन्द्र जैमिनी–१ र वडा नम्बर ४ को बीच भएर बग्ने ठेउलेखोलामा उक्त जलविद्युत् केन्द्र सञ्चालनमा छ । 

कुश्मिसेरा–सुर्कवा–ब्याडथला सडकखण्डमा आएको पहिरोले जलविद्युत् केन्द्रको बाँध क्षेत्रका संरचना आंशिक रूपमा छोपेको थियो ।