प्रभावित स्थानीयले भिजन लुम्बिनीको सेयर आवेदन दिने आज अन्तिम दिन

काठमाडौं । प्रभावित स्थानीयले भिजन लुम्बिनी ऊर्जा कम्पनी लिमिटेडको सेयर  आवेदन दिने आज अन्तिम दिन हो । कम्पनीले प्रभावितका लागि भदौ १९ गतेदेखि खुल्ला गरेको सेयर आवेदन अवधि आज साँझ ५ बजेबाट सकिन लागेको हो । 

जारी पुँजी १ अर्ब ९१ करोड २५ लाखमध्येको १० प्रतिशत अर्थात १९ करोड १२ लाख ५० हजार रकम बराबरको सय रुपैयाँ अंकित १९ लाख १२ हजार ५ सय कित्ता सेयर प्रभावित क्षेत्र अर्थात कास्की जिल्लाको माछापुच्छ्रे गाउँपालिका वडा नम्बर १, २, ३, ४ र पोखरा महानगरपालिकाको वडा नम्बर १९ का स्थानीय बासिन्दाहरुका लागि निष्कासन गरेकाे कम्पनीले जनाएको छ । प्रभावित  स्थानीयले न्यूनतम १० कित्तादेखि अधिकतम ३ लाख ८० हजार कित्तासम्म आवेदन दिन पाउनेछन् । 

कम्पनीको सेयर निष्कासन गरी बाँडफाँड गर्न मुक्तिनाथ क्यापिटल लिमिटेडलाई बिक्री प्रबन्धक तोकिएको छ । कम्पनीले कास्की जिल्लामा २५ मेगावाटको सेती नदी जलविद्युत आयोजना निर्माण गरिरहेको छ । यस आयोजनाको काम अन्तिम चरणमा पुगेको छ । विद्युत प्राधिकरणले यो आयोजनाको विद्युत हिउँदमा प्रतियुनिट ८.४० रुपैयाँ र बर्खामा ४.८० रुपैयाँमा किन्ने गरी विद्युत खरिद सम्झौता (पिपिए) गरेको छ ।