ऊर्जा खबर
काठमाडौं । नेपाल विद्युत प्राधिकरणले हेटौंडा क्षेत्रको विद्युत सेवा बन्द गरेकाे छ । प्राधिकरणले ६६ केभी हेटौडा–परवानीपुर डबल सर्किट प्रसारण लाइनमा नयाँ टावर थप गर्न र पुरानो कन्डक्टर बदली गर्नका लागि सेवा बन्द गरेकाे हो ।
नेपाल सरकार र प्राधिकरणको सयुक्त लगानीमा सञ्चालित यस डबल सर्किट प्रसारण लाइनको टावर नम्बर ३१७ देखि टावर नम्बर ३२३ सम्म २ वटा नयाँ टावर थप गर्न र पुरानो कन्डक्टर निकाली बढी क्षमताको नयाँ (एचटीएलएस) कन्डक्टर तान्ने कार्यका लागि सेवा बन्द गरिएकाे प्राधिकरणले जनाएको छ । प्राधिकरणका अनुसार सोमबार (आज) बिहान ७ बजेदेखि लाइन बन्द गरी पोल थप गर्ने र बढी क्षमताको कन्डक्टर तान्ने काम सुरु भएको छ ।
प्रसारण लाइन २० गते (बुधबार) पनि बन्द हुनेछ । लाइनको स्तरोन्नती तथा मर्मत अवधिभर सेवा साँझ ५ बजेसम्म बन्द हुनेछ । सोमबार परवानीपुर सबस्टेसनको ६६ केभी हेटौडा फिडर–बन्द गरिएको छ ।
यो फिडर बन्द हुदाँ हिमाल आईरन इण्डस्ट्रिसको विद्युत सेवा पूर्ण रुपमा बन्द हुने प्राधिकरणले जनाएको छ । प्राधिकरणका अनुसार नारायणी स्पात र त्रिवेणी स्पिनिङ मिललाई हेटौडा सबस्टेसनको फिडर–२ वाट आपूर्ति गरिने भएकोले लाइनको क्षमताको नपुगेको खण्डमा मात्र सेवा काटिनेछ ।
यस्तै, बुधबार भने हेटौडा सबस्टेसनको परवानीपुर फिडर–१ र २ र परवानीपुर सबस्टेसनको हेटौडा फिडर–२ को सेवा बन्द हुनेछ । फिडर बन्द हुँदा यी फिडरबाट वितरण हुने सम्पूर्ण क्षेत्रको सेवा बन्द हुनेछ ।
प्राधिकरणले यसअघि पनि टावर नम्बर ३०२ देखि ३१० दुँदै टावर नम्बर ३१४ र ३१५ को बिचमा ५ वटा नयाँ टावर थप र पुरानो कन्डक्टर निकाली बढी क्षमताको कन्डक्टर तान्ने काम गरेकाे थियाे ।
