ऊर्जा खबर
पर्सा । मुलुकको प्रमुख व्यापारिक नाका वीरगञ्जबाट आयात गरिने खाना पकाउने एलपी ग्यास र हवाई इन्धनकाे परिमाणमा कमी आएको छ । गत आर्थिक वर्षमा वीरगञ्ज नाकाबाट खाना पकाउने ग्यासको आयातमा ४ प्रतिशत र हवाई इन्धनको आयातमा ७१ प्रतिशतले कमी आएको हो ।
आव २०७९/८० मा वीरगञ्ज नाका प्रयोग गरी ३३ अर्ब १३ करोड रूपैयाँ बराबरको २ लाख ९० हजार २ सय ८७ मेट्रिकटन खाना पकाउने ग्यास आयात गरिएको बताउँदै वीरगञ्ज भन्सार कार्यालयका सूचना अधिकारी रघुलाल कर्णले गत आवमा ३० अर्ब रूपैयाँको २ लाख ६७ हजार ४८ मेट्रिकटन ग्यास आयात भएको जानकारी दिए । उनका अनुसार ११ हजार २३८ मेट्रिकटन कम ग्यास अयात भएको हो ।
भन्सार कार्यालयले उपलब्ध गराएको तथ्यांकअनुसार अघिलो आवमा वीरगञ्ज नाकाबाट १७ अर्ब ३१ करोड रूपैयाँको ५ लाख ९७ हजार १४४ किलोलिटर हवाई इन्धन आयात भएकामा गत आवमा १८ अर्ब २१ करोड रूपैयाँको १ लाख ७३ हजार ४८४ केल आयात भएको छ ।
सूचना अधिकारी कर्णले खाना पकाउने ग्यास र हवाई इन्धनको आयातमा सङ्कुचन देखिए पनि नेपालमा सबैभन्दा बढी इन्धनका रूपमा उपयोग हुने डिजल र पेट्रोलको आयात भने बढेको बताए । वीरगञ्ज नाकाबाट आव २०७९/८० को तुलनामा गत आवमा डिजेल ४ प्रतिशत र पेट्रोलको आयात २ प्रतिशतले बढेको उनले जानकारी दिए ।
आव २०७९/८० मा १ खर्ब १३ अर्ब ५८ करोड रूपैयाँको १० लाख ४० हजार ५०६ केल डिजेल र ३८ अर्ब २४ करोड रूपैयाँको ३ लाख ८९ हजार ७११ केल पेट्रोल आयात भएको उनले बताए ।
गत आवमा १ खर्ब ९ अर्ब २९ करोड रूपैयाँको १० लाख ८३ हजार ५२० केल डिजेल र ३९ अर्ब २ करोड रूपैयाँको ३ लाख ९४ हजार ७२३ केल पेट्रोल आयात भएको सूचना अधिकारी कर्णले जानकारी दिए ।
उनका अनुसार नेपालका लागि आवश्यक ७० प्रतिशत इन्धनको आयात वीरगञ्ज नाकाबाट हुने गरेको छ ।
