ऊर्जा खबर
काठमाडौं । नेपाल विद्युत प्राधिकरण, पोखरा वितरण केन्द्रले दुई दिनमा २१७ ग्राहकको लाइन काटेको छ । केन्द्रले ६० दिनभन्दा बढी बक्यौता बाँकी भएको ग्राहकहरूको लाइन काटेको हो ।
लामो समयसम्म विद्युत महसुल बक्यौता बाँकी रहेका ग्राहककाे लाइन काटेको केन्द्र प्रमुख राजिवकुमार सिंहले बताए । उनकाअनुसार बिहीबार १०४ ग्राहकको लाइन काटियो, उनीहरूबाट १९ लाख २१ हजार ३४० रुपैयाँ असुल गर्न बाँकी थियो । ८६ ग्राहकले १३ लाख २७ हजार ७७५ रुपैयाँ महसुल बक्यौता बुझाएपछि उनीहरुको लाइन पुनः जोडिएको छ ।
यसैगरी, शुक्रबार ११३ ग्राहकको लाइन काटेको छ । यी ग्राहकले १३ लाख ८१ ह्जार १७८ रुपैयाँ बक्यौता महसुल बुझाउन बाँकी रहेको सिंहले बताए । साथै, ९३ ग्राहकले १० लाख ८६ हजार ६०६ रुपैयाँ महसुल बुझाएपछि लाइन पुनः जोडिएको छ ।
केन्द्रले लामो समयसम्म महसुल नबुझाउने ग्राहकको लाइन काटि बक्यौता महसुल उठाउने कामलाई तिव्र गतिमा अघि बढाएको छ । बुधबार मात्र महसुल नबुझाउने १० सरकारी कार्यालयको लाइन काटेको थियो ।
यसैगरी, कारागार कार्यालय कास्कीको पनि लाइन काट्ने तयारी भइरहेको सिंहले बताए । कारागारले करिब साढे १९ लाख रुपैयाँ विद्युत् महसुल बक्यौता बुझाउन बाँकी छ । केही दिनअघि नै लाइन काट्ने तयारी गरिए पनि कारागारले थप समय मागेपछि एक साता समय दिइएको छ । आइतबारसम्म महसुल नबुझाए लाइन काटिने उनले जानकारी दिए ।
याे पनि पढ्नुहाेस
विद्युत् महसुल नतिर्ने गण्डकीका १२ सरकारी कार्यालयको लाइन काटियो
