ऊर्जा खबर
काठमाडौं । पछिल्लो ५ महिनाको अवधिमा देशको विभिन्न ठाउँमा पहिचान भएका ३४९.७९ मेगावाटका आयोजनाले अध्ययन अनुमति पाएका छन् । निजी ऊर्जा उत्पादकहरूले पहिचान गरेको उक्त मेगावाटका १० आयोजनाले अध्ययन अनुमति पाएका हुन् ।
२०७९ माघ देखि २०८० जेठसम्ममा ३४९.७९ मेगावाटका १० आयोजनालाई अध्ययन अनुमति दिएको विद्युत विकास विभागले जनाएको छ । विभागले ३ मेगावाटदेखि १०० मेगावाटसम्मका आयोजनालाई अनुमित दिइएको हो ।
अध्ययन अनुमति पाएको आयोजनामध्ये सबै भन्दा ठुलो १०० मेगावाटको जिल्ली चुम्ली खोला जलविद्युत आयोजना रहेको छ । सक्क्षम हाइड्रो पावर लिमिटेडले कालिकोटमा पहिचान गरेको आयोजनाले २०८० जेठ ४ गते अनुमति पाएको थियो ।
यसैगरी, ७५ मेगावाटको त्रिशूली गल्छी आयोजनाले पनि अध्ययन अनुमति पाएको छ । अपि पावर कम्पनी लिमिटेडले पहिचान गरेको उक्त आयोजनाले २०७९ चैत १२ गते अनुमति पाएको थियो । तपोवान हाइड्रो पावर प्रालिले बझाङमा पहिचान गरेको ७२ मेगावाटको तपोवान सेती (पिआरओआर) आयोजनाले पनि २०८० बैशाख ९ गते अध्ययन अनुमति पाएको छ ।
५२ मेगावाटका माकाली सेती, ९.८ मेगावाटको लुजा खोला क्यास्केड, ९.५ मेगावाटको तल्लो लिखु क्यास्केड, ८ मेगावाटको तल्ले इङवा खोला, ४.९९ मेगावाटको लापा खोला र ३.५ मेगावाटको फेदी खोला जलविद्युत आयोजनाले अध्ययन अनुमति पाएको विभागले जनाएको छ ।
