ऊर्जा खबर
काठमाडौं । बुटवल पावर कम्पनीले ७.९ मेगावाटको चिनो खोला जलविद्युत आयोजना निर्माण गर्ने भएको छ । कम्पनीले गण्डकी प्रदेशको मनाङ जिल्लामा पहिचान भएको आयोजना अघि बढाउन लागेको हो ।
अध्ययन पूरा भएको आयोजनाको उत्पादन अनुमतिपत्र लिने प्रक्रिया अन्तिम चरणमा पुगेको छ । विद्युत विकास विभागले कम्पनीलाई उत्पादन अनुमतिपत्र दिन ३५ लिने सूचना जारी गरेको छ ।
विभागका अनुसार वन तथा वातावरण मन्त्रालयबाट स्वीकृत वातावरणीय प्रभाव मूल्याङ्कन प्रतिवेदन र आयोजनाको अध्ययन रिपोर्टका आधारमा प्रवद्र्धक कम्पनीलाई उत्पादन अनुमतिपत्र दिने तयारी भइरहेको छ ।
विभागले अनुमतिपत्र जारी गर्नुअघि आयोजना निर्माण तथा सञ्चालन गर्दा पर्न सक्ने प्रतिकुल असरका बारेमा सम्बन्धित सरोकारवालासँग राय\सुझाव मागेको छ । विभागले सूचना जारी भएको मितिले ३५ दिनभित्र प्राप्त हुने गरी राय\सुझाव पठाउन सरोकारवाला समक्ष आग्रह गरेको छ ।
सरोकारवालाले राय\सुझाव विभाग वा प्रवद्र्धक कम्पनीको कार्यालयमा प्राप्त हुने गरी पठाउन सक्ने विभागले जनाएको छ । आयोजनाको मुख्य संरचनाहरु बाँध खोलाको बायाँ किनारमा रहनेछ । विद्युतगृह दायाँ किनारमा रहनेछ ।
बाँधको पानीलाई करिब ४११ मिटर लामो सुरुङ र २ हजार ४ सय ३३ मिटर लामो पेनस्टक पाइप हुँदै विद्युतगृहमा पुर्याइनेछ । विद्युतगृहमा जडान भएको ४.०९९ मेगावाटको २ वटा टवाईनसँग जोडिएको २ वटा ३ फेजको जेनेरेटरमार्फत विद्युत उत्पादन गरिने कम्पनीले जनाएको छ ।
आयोजनाबाट २०८० भदौभित्र उत्पादन गर्ने कम्पनीले जनाएको छ । कम्पनीका अनुसार आयोजना पूरा भएपछि ४३.९९ गिगावाट घन्टा विद्युत उत्पादन हुनेछ ।
उत्पादीत विद्युत ३३ केभी प्रसारण लाइन मार्फत ३ किलोमिटर दुरीमा रहेको नेपाल विद्युत प्राधिकरणको मनाङ हब सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनी आफैले निर्माण गर्नेछ ।
