ऊर्जा खबर
काठमाडौं । ऊर्जा, जलस्रोत तथा सिँचाइ मन्त्री पम्फा भुसालले अहिले विद्युत आपूर्तिमा देखिएको समस्या सामान्य रहेको हुँदा तत्काल यसको समाधान हुने बताएकी छन् । नेपाल उद्योग वाणिज्य महासंघका पदाधिकारी तथा अन्य उद्योगी व्यवसायीहरूसँगको छलफलमा उनले यस्तो बताएकी हुन् ।
बैशाख १९ गते मन्त्रालय व्यवसायीहरूसँग छलफल गर्दै उनले भनिन्, ‘विद्युत आपूर्तिमा देखिएको समस्या हाम्रो कारणबाट उत्पन्न भएको होइन, विश्वव्यापी समस्या हो । नेपालको सन्दर्भमा यसलाई सल्टाउन सरकार प्रतिबद्ध भएर लागेको छ ।’
विगतमा ऊर्जा सुरक्षाका लागि ठूला जलाशय आयोजना नबन्दा सुख्खा समयमा समस्या देखिने गरेको स्पष्ट पार्दै मन्त्री भुसालले केही दिनका लागि देखिएको समस्यालाई राजनीतिकरण नगर्नसमेत आग्रह गरिन् । ‘ऊर्जाकै कारण हामीले समस्या भोग्नु पर्दैन, विगतमा ऊर्जा सुरक्षालाई ध्यान नदिँदा क्षणिक समस्या आएको हो, आगामी दिनमा यस्ता समस्या सल्टिँदै जानेछन्,’ उनले थपिन् ।
यसैगरी, मन्त्रालयका सचिव देवेन्द्र कार्कीले हाम्रो ऊर्जा प्रणालीमा देखिएको क्षणिक समस्या केही दिनमै हल हुने बताउँदै आत्तिनुपर्ने अवस्था नहरेको बताए । ‘यो समस्या क्षणिक हो, राज्यले यसलाई सम्बोधन गर्छ,’ उनले भने । नेपाल विद्युत प्राधिकरणका कार्यकारी निर्देशक कुलमान घिसिङले पनि अहिलेको समस्यालाई लिएर आत्तिनुनपर्ने बताए ।
छलफलका क्रममा उद्योग वाणिज्य महासंघका अध्यक्ष शेखर गोल्छाले विद्युत् आपूर्तिमा देखिएको समस्याबारे जानकारी गराउँदै भने, ‘विद्युत आपूर्तिमा ठूलो समस्या देखिएको छ, यसलाई सरकारले तत्काल समाधान गर्नुप¥यो ।’ महासंघका वरिष्ठ उपाध्यक्ष चन्द्रप्रसाद ढकालले समेत विद्युत आपूर्ति सहज तुल्याउन सरकार र निजी क्षेत्रसँगसँगै मिलेर काम गर्नुपर्नेमा जोड दिए ।
