मनकामना इन्जिनियरिङ हाइड्रो पावरले २८ लाख कित्ता सेयर निष्कासन गर्दै

काठमाडौं । मनकामना इन्जिनियरिङ हाइड्रो पावर लिमिटेडले २८ लाख कित्ता साधारण सेयर निष्कासन गर्ने भएको छ । कम्पनीले आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन गर्न लागेको हो ।

सय रुपैयाँ अंकित २८ करोड रुपैयाँ बराबरको २८ लाख कित्ता साधारण सेयर निष्कासन गर्ने तयारी गरेको कम्पनीले जनाएको छ । कम्पनीका अनुसार सेयर निष्कासन अनुमतिका लागि नेपाल धितोपत्र बोर्डमा आवेदन दिइएको छ ।

कम्पनीले बोर्डमा माघ १६ गते (सोमबार) आवेदन दिएको हो । बोर्डबाट अनुमति पाउने लगतै पहिलो चरणमा आयोजना प्रभावित स्थानीय र दोस्रो चरणमा सर्वसाधारणका लागि सेयर निष्कासन गर्ने कम्पनीले जनाएको छ ।

कम्पनीले सेयर निष्कासन गरी बाँडफाँड गर्न बीओके क्यापिटल मार्केट लिमिटेडलाई बिक्री प्रबन्धक तोकेको छ । कम्पनीको दोलखामा ५ मेगावाटको घट्टे खोलाले विद्युत उत्पादन गरिरहेको छ । अहिले थप नयाँ आयोजना निर्माण गर्ने तयारी गरिरहेको कम्पनीले जनाएको छ ।