ऊर्जा खबर
काठमाडौं । भगवती हाइड्रो पावर डेभलपमेन्ट कम्पनीले करिब १४ लाख ३० हजार कित्ता सेयर निष्कासन गर्ने भएको छ । कम्पनीले कास्कीमा सञ्चालनमा रहेको ४.५ मेगावाटको बिजयपुर–१ जलविद्युत केन्द्रको स्थानीय र सर्वसाधारणका लागि छुट्याएको सेयर निष्कासन गर्न लागेको हो ।
सय रुपैयाँमा अंकित १४ करोड ३० लाख १६ हजार २ सय रुपैयाँ बराबरको १४ लाख ३० हजार १ सय ६२ कित्ता सेयर निष्कासन गर्न लागेको कम्पनीले जनाएको छ । कम्पनीका अनुसार सेयर निष्कासन गरी बाँडफाँड गर्न सिद्वार्थ क्यापिटल लिमिटेडलाई बिक्री प्रबन्धक नियुक्त गरिएको छ ।
निष्कासन गर्न लागिएको सेयरमध्ये ५ करोड ७२ लाख ६ हजार ४ सय रुपैयाँ बराबरको ५ लाख ७२ हजार ६४ कित्ता आयोजना प्रभावित स्थानीयका लागि छुट्याइएको छ । बाँकी, ८ करोड ५८ लाख ९ हजार ८ सय रुपैयाँ बराबरको ८ लाख ५८ हजार ९८ कित्ता सेयर सर्वसाधारणका लागि छुट्याइएको छ ।
सेयर निष्कासन अनुमतिका लागि नेपाल धितोपत्र बोर्डमा आवेदन दिने तयारी भइरहेको पनि कम्पनीले जनाएको छ । बोर्डबाट अनमति पाउनले लगतै पहिलो चरणमा स्थानीयका लागि सेयर निष्कासन गरी बाँडफाँड गरिनेछ ।
कम्पनीले निर्माण सम्पन्न गरी सञ्चालनमा ल्याएको आयोजनाले २०६९ भदौ ५ गतेदखि नियमीत विद्युत उत्पादन गरिरहेको छ ।
.jpg)
